Jobs in Goa : गोमंतकीय युवकांना रोजगार पुरविण्यास सत्ताधारी सरकार पूर्णतः अपयशी ठरले आहे. केवळ निवडणुकीवेळीच भाजपला बेरोजगारी आठवते. तो आता त्‍यांचा अजेंडा झालेला आहे. नोकऱ्यांबाबत हे सरकार तरुणाईची चेष्टा करत आहे, असा आरोप आम आदमी पक्षाचे गोवा उपाध्यक्ष ॲड. सुरेल तिळवे यांनी पत्रकार परिषदेत केला. यावेळी हेंझेल फर्नाडिस, अनुप कुडतरकर व राजदीप नाईक यांचीही उपस्थिती होती.

तिळवे म्हणाले की, विद्यमान सरकारने युवकांची क्रूर चेष्टा चालवलेली आहे. निवडणुकीपूर्वी दहा हजार नोकऱ्या देण्याचे आश्वासन या सरकारने दिले होते. मात्र निवडणुका संपताच आता ‘यापुढे नोकऱ्या देता येणार नाहीत’ असे मुख्यमंत्री सांगत आहेत. त्यामुळे निवडणुकीसाठी फंड उभारणे हा भाजप सरकारचा नोकऱ्यांच्या आश्वासनामागील हेतू होता हे स्पष्ट झाले आहे, असा आरोपही त्‍यांनी केला.

कुडतरकर म्हणाले की, ‘आप’ने पंजाबमध्ये नोकऱ्यांबाबत दिलेली आश्‍वासने कशी पाळली, हे गोव्यातील भाजप सरकारने एकदा पहावे. ‘आप’ने 26 हजार नोकऱ्यांची घोषणा केली होती आणि आता त्या टप्प्या-टप्प्याने भरल्‍या जात आहेत. शिवाय प्रत्येक घरात नोकरी देण्याचा प्रयत्न करत आहे.