पणजी: गोवा वैद्यकीय महाविद्यालय (जीएमसी) आणि रुग्णालयाच्या हृदयविकार विभागात गेल्या बारा वर्षांपासून करार (कंत्राटी) पद्धतीवर कार्यरत असलेल्या कर्मचाऱ्यांनी आपल्या सेवांचे नियमितीकरण करून नोकऱ्या कायम करण्याची मागणी केली आहे. यासंदर्भात त्यांनी सार्वजनिक आरोग्य विभागाच्या संयुक्त सचिवांकडे निवेदन सादर केले आहे.

निवेदनात कर्मचाऱ्यांनी नमूद केले आहे की, २०१३ पासून ते हृदयविकार विभागात विविध जबाबदाऱ्या सांभाळत असून रुग्णसेवा आणि विभागाचे दैनंदिन कामकाज सुरळीत ठेवण्यात त्यांनी महत्त्वाची भूमिका बजावली आहे. अनेक वर्षे सातत्याने आणि प्रामाणिकपणे सेवा बजावूनही आजतागायत त्यांना कायम स्वरूपाची नोकरी मिळालेली नाही.

करार पद्धतीवर असल्यामुळे नोकरीची शाश्वती, वेतनवाढ, निवृत्तीवेतन, वैद्यकीय सुविधा तसेच नियमित कर्मचाऱ्यांना मिळणारे इतर लाभ त्यांना मिळत नसल्याची खंत त्यांनी व्यक्त केली आहे. दीर्घकाळ सेवा देऊनही कायमस्वरूपी सेवेत न घेणे अन्यायकारक असल्याचेही त्यांनी म्हटले आहे.

कर्मचाऱ्यांनी आपल्या मागणीच्या समर्थनार्थ सर्वोच्च न्यायालयाच्या एका महत्त्वपूर्ण निर्णयाचा संदर्भ दिला आहे. सार्वजनिक संस्थांमध्ये अनेक वर्षे अखंडपणे सेवा देणाऱ्या तात्पुरत्या कर्मचाऱ्यांच्या बाबतीत शासनाने संवेदनशील भूमिका घेऊन त्यांच्या सेवांचे नियमितीकरण करण्याबाबत विचार करावा, असे न्यायालयाने स्पष्ट केल्याचा दावा त्यांनी केला आहे.

सरकारी यंत्रणांनी रोजगाराच्या बाबतीत न्याय्य धोरण अवलंबावे आणि दीर्घकाळ सेवा देणाऱ्या कर्मचाऱ्यांवर अन्याय होऊ देऊ नये, अशी मागणीही निवेदनात करण्यात आली आहे. सर्वोच्च न्यायालयाने घालून दिलेल्या निकषांमध्ये आपण पात्र ठरत असल्याचा दावा करत शासनाने तातडीने हस्तक्षेप करून आपल्या नोकऱ्या कायम कराव्यात, अशी मागणी कर्मचाऱ्यांनी केली आहे.