गोमन्तक-तनिष्का व्यासपीठाच्या माध्यमातून वटपौर्णिमा आणि जागतिक पर्यावरण दिवसाच्या निमित्ताने तनिष्का गटातील महिलांसाठी वडाचे झाड लावण्याचा उपक्रम आयोजित करण्यात आला होता. या उपक्रमाला राज्यातून जोरदार प्रतिसाद मिळाला.

राज्यभरातील महिलांनी पारंपरिक पद्धतीने वटपौर्णिमेचा सण मोठ्या उत्साहाने साजरा केलाच; पण त्यासोबतच तनिष्का व्यासपीठाने आयोजित केलेल्या ‘चला बदल घडवू या’ या उपक्रमाअंतर्गत आपापल्या भागात वडाचे रोप लावून वटपौर्णिमेला एक वेगळा अर्थ प्राप्त करून दिला. आजही खूप ठिकाणी वडाच्या झाडाची फांदी तोडून आणून फांदीची पूजा केली जाते. सण साजरे करताना निसर्गाची हानी होऊ नये, महिलांच्या हातून नवे झाड लावले जावे, या उद्देशाने ‘चला बदल घडवू या’ या नावाने वडाचे रोप लावण्याचा कार्यक्रम आयोजित करण्यात आला होता.

तनिष्का व्यासपीठतर्फे आयोजित या उपक्रमात महिलांनी मोठ्या उत्साहाने भाग घेतला. तनिष्का गटात कार्यरत असलेल्या हरमल, पालये, मुळगाव, वास्को, मुरगाव, चिखली, सांगे, काणकोण या भागातील महिलांनी आपापल्या गावात वडाचे रोप लावून त्याची पूजा केली. दक्षिण गोव्यातील कार्यक्रमाचे संयोजन सुस्मिता कुमठेकर यांनी केले.

वनविभागाचे सहकार्य

सांगे वनविभागाच्या सहकार्याने वडाची रोपे तनिष्का गटांना देण्यात आली. वनविभाग रक्षक अशोक वेळीप यांनी या उपक्रमासाठी मुद्दाम वडाची रोपे तयार करून दिली. दरवर्षी पारंपरिक पद्धतीने वटपौर्णिमा साजरी केली जाते. पण सामाजिक जागृती करण्याचे काम तनिष्का गटातील महिलांनी वटपौर्णिमेच्या निमित्ताने केले आणि आपापल्या भागात बदल घडवून आणण्यात मोठ्या उत्साहाने सहभाग घेतला.

वडाच्या झाडाची फांदी तोडून आपण निसर्गाचे नुकसान करीत आहोत. अशीच परिस्थिती राहिली तर भविष्यात कदाचित पुढच्या पिढीला फक्त चित्रातच वडाचे झाड बघायला मिळेल. ही परिस्थिती येऊ नये, म्हणून आज आम्ही तनिष्का गटांना वडाच्या झाडाची रोपे दिली आणि ती सार्वजनिक ठिकाणी लावून त्याचीच पूजा केली.

पूजा ठाकूर, उत्तर गोव्यातील तनिष्का गटांच्या संयोजक