नवीन शैक्षणिक धोरण आणि शिक्षण क्षेत्रातील बदलत्या आव्हानांना सामोरे जाण्यासाठी राज्यातील पालकांना संघटित करण्यासाठी काही शिक्षणज्ज्ञ पुढे सरसावले आहेत. ''गोमंतक पालक परिषद''या बॅनरखाली चळवळ सुरु करण्याचा संकल्प या शिक्षणतज्ञांनी केला आहे.

या पार्श्वभूमीवर येत्या शनिवारी (ता.25) डिचोली तालुक्यातील पालकांसाठी एका विशेष परिषदेचे आयोजन केले आहे. सायंकाळी 4 वा. डिचोलीतील दीनदयाळ सभागृहात ही परिषद होणार आहे.

पालक परिषदचा राज्यभर व्याप्ती आणि प्रसार व्हावा. त्यादृष्टीने विचारविनिमय करण्यात येणार आहे, अशी माहिती शिक्षणतज्ञ प्रा. दिलीप बेतकीकर यांनी डिचोलीत पत्रकार परिषदेत दिली. सोमवारी (ता.20) डिचोलीत घेतलेल्या पत्रकार परिषदेस शिक्षणतज्ञ आणि निवृत्त मुख्याध्यापक रामचंद्र गर्दे आणि कांता पाटणेकर यांच्यासह शिक्षक संदेश बाराजणकर तसेच कालिदास कवळेकर उपस्थित होते.

पालक आणि शिक्षक हे मुलांचे पंख आहेत. हे दोन्ही पंख समर्थ आणि प्रबळ असेल, तर मुलांची प्रगती ठरलेली आहे. तरीदेखील सद्यस्थितीत काही पालकांमध्ये उदासीनता दिसून येते. पालकांमधील मरगळ दूर करुन पालकांना एक व्यासपीठ उपलब्ध करुन देण्यासाठी ''गोमंतक पालक परिषद'' स्थापन करण्याची कल्पना पुढे आली आहे.

या चळवळीच्या माध्यमातून पालकांना संघटित करुन त्यांच्या कर्तव्याबाबत वेळोवेळी जागृती करण्यात येणार आहे, अशी माहिती प्रा.दिलीप बेतकीकर यांनी दिली.

नवीन शैक्षणिक धोरणामुळे मोठा बदल अपेक्षित आहे. या बदलांना सामोरे जाण्यासाठी पालकांनी सतर्क राहणे आवश्यक आहे. हे धोरण लवचिक आहे. या धोरणामध्ये पालकांची भूमिका महत्वाची ठरणार आहे.

नवीन शैक्षणिक धोरणाची क्रिया जरी शाळेत होणार असली, तरी पालकांच्या सहकार्यावरच या धोरणाचे यश अवलंबून असणार आहे. मुलांचे कौशल्य विकसित करणे आणि त्यांच्या प्रश्नाबाबतीत पालकांना जागृत करणे.

हा पालक परिषद स्थापन करण्यामागील हेतू आहे, असे प्रा. बेतकीकर यांनी स्पष्ट केले. रामचंद्र गर्दे यांनी पालक परिषद स्थापन करण्यामागील हेतू सांगून, सद्यस्थितीत पालकांची भूमिका याविषयी विवेचन केले.