Shiroda News : शिरोडा गोमंतक आयुर्वेद महाविद्यालय आणि संशोधन केंद्र शिरोडा यांच्या संहिता सिध्दांत विभागातर्फे संहिता अध्ययन या दोन दिवशीय कार्यशाळेचे आयोजन केले होते. कार्यशाळेची सुरुवात पारंपरिक दीपप्रज्वलन आणि धन्वंतरी स्तवनाने झाली.

यावेळी मंचावर भारतीय संस्कृती प्रबोधिनीचे अध्यक्ष ॲड नरेंद्र सावईकर, प्रमुख पाहुणे डॉ. उपेंद्र दीक्षित, प्रमुख वक्ते डॉ. अभिजीत सराफ (नाशिक) सचिव श्री गजानन बखले, प्राचार्य डॉ. अनुरा प्र. बाळे, डॉ. बिष्णूप्रिया मोहंती(विभाग प्रमुख संहिता सिध्दांत), डॉ. समीर जोशी (सहयोगी प्राध्यापक संहिता सिध्दांत विभाग) हे उपस्थित होते.

प्राचार्य डॉ. अनुरा बाळे यांनी वक्त्यांची ओळख करून दिली. प्रमुख पाहुणे डॉ. उपेंद्र दीक्षित यांनी संहिता पठणाचे महत्त्व आणि त्याचे नैदानिक महत्व यावेळी विषद केले.

ॲड नरेंद्र सावईकर यांनी यावेळी बोलताना प्राचार्य आणि संहिता सिध्दांत विभागाच्या प्राध्यापकांनी कार्यशाळेसाठी घेतलेल्या पुढाकाराचे कौतुक केले. डॉ. समीर जोशी यांनी सूत्रसंचालन केले. डॉ. मोहंती यांनी आभार मानले. या कार्यशाळेत १४० हून अधिक विद्यार्थी सहभागी झाले होते.