Gold Chain Snatching At Bus Stop Goa Woman Loses 1Lakh Jewelry

मडगाव: बस स्टॉपवर बसची वाट पाहत उभ्या असलेल्या एका 54 वर्षीय महिलेचे अंगावरील मंगळसूत्र हिसकावून दुचाकीवरुन आलेल्या दोन अज्ञातांनी पळ काढला. तेंबी-राय येथे भरदिवसा सकाळी 9 वाजता ही खळबळजनक घटना घडली. चोरीला गेलेल्या मंगळसूत्राची किंमत 1 लाख 10 हजार इतकी असल्याचे सांगितले जात आहे. सुषमा शिरोडकर असे पीडितेचे नाव आहे.

मायणा कुडतरी पोलिसांकडून गुन्ह्याची नोंद

मायणा-कुडतरी पोलिसांनी अज्ञातांविरोधात गुन्ह्याची नोंद केला असून उपनिरीक्षक वेरॉनिक कुतिन्हो यांच्या मार्गदर्शनाखाली पुढील तपास सुरु आहे. चोरीची ही घटना 10 मार्च रोजी घडली होती. शिरोडकर या एका बँकेत (Bank) ब्रँच मॅनेजर असून त्या बससाठी उभ्या असताना दुचाकीवरुन दोन अज्ञात तरुण तिथे आले. काही कळण्याच्या आत त्यांनी शिरोडकर यांच्या गळ्यातील मंगळसूत्र हिसकावून दुचाकीवरुन पळ काढला. शिरोडकर यांनी मदतीसाठी आरडाओरडा केल्यानंतर घटनास्थळी लोक जमा झाले. मात्र, तोपर्यंत चोरटे पळून गेले होते.

मधलावाडा-विर्नोडा येथे अशीच चोरीची घटना घडली

काही दिवसांपूर्वी, मधलावाडा विर्नोडा येथूनही अशीच मंगळसूत्र चोरीची घटना समोर आली होती. सुचिता सीताराम नाईक (वय 43) या कामात व्यस्त असताना दोन चोरट्यांनी डाव साधला होता. काही कळाच्या आता चोरट्यांनी सुचिता यांचे मंगळसूत्र लंपास केले. लंपास केलेल्या सोन्याच्या मंगळसूत्राची किंमत दीड लाख रुपये एवढी होती. हे दोन्ही चोरटे काळ्या रंगाच्या पल्सर मोटारसायकलने होते. दरम्यान ते दोघेही हिंदीत बोलत असल्याची माहिती नाईक यांनी पोलिसांना दिली होती.