Goa Blue Cab: मोपा विमानतळावर विमानांची ये-जा गुरूवारी 5 जानेवारीपासून सुरू होत आहे. या सुरू होत असलेल्या व्यावसायिक ऑपरेशनच्या पार्श्वभुमीवर मुख्यमंत्री डॉ. सावंत यांनी पर्यटनमंत्री रोहन खंवटे, वाहतूकमंत्री माविन गुदिन्हो, उत्तर गोवा जिल्हाधिकारी, पोलिस अधीक्षक, वाहतूक अधीक्षक यांची बैठक झाली. यात त्यांनी विविध सूचना प्रशासनाला केल्या आहेत.

विमानतळावरून प्रवाशी वाहतुकीसाठी टॅक्सी सेवा सुरू करण्यासाठी सरकारने ‘गोवा टॅक्सी अ‍ॅप’ सुरू केले आहे. मात्र, अद्यापही ते कार्यान्वित झालेले नाही. दुसरीकडे पेडणे तालुक्यातील टॅक्सी व्यावसायिकांचे काळ्या-पिवळ्या टॅक्सीसाठी स्वतंत्र काउंटर सुरू करावे, या मागणीसाठी आंदोलन सुरू केले होते. सरकारने ही मागणीही मान्य केली आहे. या टॅक्सींसाठी ‘ब्ल्यू कॅब अ‍ॅप’ सुरू करण्यात आले असून उद्या, गुरूवारी 5 जानेवारी रोजी ते सुरू करण्यात येईल. पेडणे तालुक्यातील टॅक्सीचालकांनी त्यावर नाव नोंदणी करावी, असे आवाहन मुख्यमंत्र्यांनी केले.

वाहतूक मंत्री मॉविन गुदिन्हो म्हणाले की, वाहतुक मंत्रालयातर्फे पेडणेतील टॅक्सी चालकांसाठी ब्ल्यू कॅब सुरू करण्यात येईल. त्यामुळे यापुढे मोपा विमातळावर पेडणेतील स्थानिक टॅक्सी चालकांसाठी आता काळी-पिवळी टॅक्सी नसेल. याबाबतची नोटीस उद्या, ५ जानेवारी रोजी प्रसिद्ध करण्यात येईल. गोवा टॅक्सी अ‍ॅपवर आत्तापर्यंत ११०० टॅक्सी मालकांनी नोंदणी केली आहे. छाणणीनंतर १०० हून अधिक टॅक्सी रोडवर धावण्यास सज्ज आहेत. विमानतळावरील कायदा आणि सुव्यवस्था बाधित होऊ नये, याची खबरदारी घेतली आहे.