Gold From Mushrooms

निसर्गत: उपलब्ध होणाऱ्या आळंबीपासून सोन्याचे सुक्ष्म कण तयार करता येतील, असे महत्वपूर्ण संशोधन गोव्यातील डॉ. सुजाता दाबोळकर यांनी केले आहे. या कणांचा कर्करोगासाठी उपयोग होणाऱ्या औषधांमध्ये देखील वापर करता येऊ शकणार आहे.

वारुळावर उगवणारे हे आळंबी टर्मिटोमाइसेस प्रजातीचे असून, स्थानिक लोक त्यांना 'रान ओल्मी' म्हणतात. दाबोळकर यांनी गोवा विद्यापीठात याबाबत संशोधन केले आहे.

डॉ. सुजाता दाबोळकर यांना या संशोधनात डॉ.नंदकुमार कामत यांनी मार्गदर्शन केले. अलिकडेच राज्याचे पर्यावरण मंत्री आलेक्स सिक्वेरा यांच्यासमोर हा शोधनिबंध सादर करण्यात आला.

टेलर आणि फ्रान्सिस यांनी प्रकाशित केलेल्या जर्नल ऑफ जिओमायक्रोबायोलॉजीमध्ये याबाबतचा शोधनिबंध प्रकाशित झाला आहे.

एक लिटर अळंबीच्या गोळ्यांमधून 01 ग्रॅम सुक्ष्म कण तयार करता येऊ शकतात, यासाठी सरासरी 100 रुपये येऊ शकतो, अशी माहिती डॉ.नंदकुमार कामत यांनी पत्रकार परिषदेत दिली.

संशोधकांनी गोव्याला या शोधातून आर्थिक लाभ मिळू शकतो असे म्हटले आहे. याचा वैद्यकीय क्षेत्राला मोठा फायदा होईल, असा त्यांचा दावा आहे.

रुग्णाला कोणतेही औषध द्यायचे असल्यास ते नॅनोपार्टिकलवर ठेवून शरीरात पाठवता येईल. संशोधन औषध वितरण, वैद्यकीय इमेजिंग आणि इलेक्ट्रॉनिक्स उत्पादनात क्रांती घडवेल, असा विश्वास संशोधकांनी व्यक्त केला आहे.

सोन्याच्या नॅनोपार्टिकलची किंमत खूप जास्त आहे. फेब्रुवारी 2016 पर्यंत, एक मिलिग्राम सोन्याच्या नॅनोपार्टिकलची किंमत अंदाजे 80 डॉलर होती, जी प्रति ग्रॅम 80,000 डॉलरच्या समतुल्य आहे.