पणजी: गोव्यातून दिल्लीला निघालेल्या एअर इंडिया कंपनीच्या विमानाला दाट धुक्याचा फटका बसला आहे. राजधानीत असेलल्या दाट धुक्यामुळे ही फ्लाईट गुजरातच्या अहमदाबादमध्ये लँड करण्यात आली. दृष्यमानता कमी असल्यामुळे फ्लाईट डायव्हर्ट करण्याचा निर्णय घेण्यात आला.

ANI या वृत्तसंस्थेने दिलेल्या वृत्तानुसार, उत्तर गोव्यातील मोपा विमानतळावरुन एअर इंडिया एक्सप्रेसच्या फ्लाईटने रविवारी (२८ डिसेंबर) रात्री ११.५५ वाजता उड्डाण घेतले. ही फ्लाईट दिल्ली विमानतळावर पहाटे २.३५ वाजता लँड होणार होती.

पण, दाट धुक्यामुळे फ्लाईट अहमदाबादला डायव्हर्ट करण्यात आली. जयपूर विमानतळावर अगोदरच गर्दी असल्याने फ्लाईट जयपूरला वळविण्याचा निर्णय रद्द करण्यात आल्याचे वृत्तात म्हटले आहे.

सोमवारी देखील राजधानी दिल्लीत दाट धुक्याचा चादर पाहायला मिळत असून, यामुळे अनेक विमानाची उड्डाणे व लँडिंगला अडथळा निर्माण झाला आहे. खराब वातावरणाच्या पार्श्वभूमीवर दिल्ली विमानतळाने विमान कंपन्यांसाठी मार्गदर्शक सूचना जारी केली आहे.

दरम्यान, भारतीय हवामान खात्याने दिल्लीत दाट धुक्याची शक्यता वर्तवली असून, ऑरेंट अलर्ट जारी केला आहे.

दाट धुक्यामुळे विमानांची ये – जा याच्यावर परिणाम होण्याची शक्यता आहे, असे इंदिरा गांधी आंतरराष्ट्रीय विमानतळाने स्पष्ट केले आहे. काही फ्लाईट रद्द देखील होण्याचा अंदाज विमानतळाने म्हटले आहे. कॅट ३ प्रणालीनुसार विमानतळावरील कामकाज चालत असल्याचे विमानतळ प्रशासनाने सांगितले आहे