Yuri Alemao डॉ. प्रमोद सावंत यांच्या नेतृत्वाखालील गोव्यातील भाजप सरकारने गोव्याला मानवी तस्करी, ड्रग्ज, प्रदूषणकारी आणि घातक पदार्थांची वाहतूक आणि दारूची तस्करी करणारे ‘ट्रान्सिट हब’ बनविल्याचा गंभीर आरोप विरोधी पक्षनेते युरी आलेमाव यांनी केला आहे.

कर्नाटकचे मुख्यमंत्री सिद्धरामय्या यांनी गोव्यातून अवैध दारूची तस्करी रोखण्यासाठी उत्पादन शुल्क विभागाच्या अधिकाऱ्यांना दिलेल्या निर्देशांवर प्रतिक्रिया व्यक्त करताना युरी आलेमाव यांनी हा आरोप केला आहे.

गोव्यातून कर्नाटकात मोठ्या प्रमाणावर बेकायदेशीररीत्या दारूची तस्करी होत आहे, असा आरोप कर्नाटकचे मुख्यमंत्री सिद्धरामय्या यांनी केला आहे. या पार्श्वभूमीवर गोव्याचे मुख्यमंत्री डॉ. प्रमोद सावंत काय उत्तर देतील, असा सवाल विरोधी पक्षनेते युरी आलेमाव यांनी केला आहे.

कर्नाटकात आजही भ्रष्ट भाजप सरकारच राज्य करत असल्याचा भास गोव्याचे मुख्यमंत्री डॉ. प्रमोद सावंत यांना होत असावा. कर्नाटकातील जनतेने भ्रष्टाचार संपवण्यासाठी काँग्रेसचे सरकार निवडून दिले आहे.

कर्नाटकचे मुख्यमंत्री सिद्धरामय्या यांनी गोव्यातून कर्नाटकात होणारी दारूची तस्करी थांबवावी, असे आदेश आपल्या अधिकाऱ्यांना दिले आहेत. मुख्यमंत्री सावंत याची दखल घेऊन दारूमाफियांवर कारवाई करतील का? असा सवाल आलेमाव यांनी केला आहे.

कर्नाटकात भाजपचे सरकार असताना गोव्यातून अवैध दारूच्या वाहतुकीकडे भाजप सरकारने जाणीवपूर्वक डोळेझाक केली, हे स्पष्ट आहे. मुख्यमंत्री डॉ. प्रमोद सावंत यांनी कर्नाटकातील भाजप सरकारचा आशीर्वाद असलेल्या दारू माफियांना मदत करण्यासाठी गोव्याच्या आर्थिक नुकसानाकडे दुर्लक्ष केले.

- युरी आलेमाव, विरोधी पक्षनेते