मोरजी: व्हॉट्स ॲपवर घरबसल्या पार्टटाईम नोकरीचे आमिष दाखवून कोरगाव येथील २५ वर्षीय युवतीची ३ लाख ६९ हजार ४०० रुपयांची ऑनलाइन फसवणूक झाल्याची घटना उघडकीस आली आहे. याप्रकरणी मांद्रे पोलिस ठाण्यात अज्ञात व्यक्तीविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, देऊळवाडा-कोरगाव येथील एका युवतीला अज्ञात व्यक्तीने व्हॉट्स ॲप ग्रुपमध्ये सामील करून घरातून करता येणाऱ्या पार्टटाईम नोकरीची ऑफर दिली. सुरवातीला काही कामे पूर्ण केल्यानंतर तिला थोडी रक्कम देण्यात आली. त्यामुळे विश्वास बसून तिने पुढील कामे स्वीकारली.

यानंतर कमावलेली रक्कम काढण्याचा प्रयत्न करताच, चुकीचा विथड्रॉल पर्याय निवडल्याचे सांगून अतिरिक्त पैसे जमा करण्यास सांगण्यात आले. त्यानंतर बँक खात्याचा क्रमांक चुकीचा भरल्याचे कारण देत खाते ‘अनफ्रीझ’ करण्यासाठी २ लाख रुपये, तसेच क्रेडिट स्कोअर कमी असल्याचे सांगून आणखी १.४० लाख रुपये भरण्यास भाग पाडण्यात आले.

वेगवेगळ्या कारणांनी पैसे भरत असताना एकूण ३,६९,४०० रुपये जमा केल्यानंतर आपली फसवणूक झाल्याचे युवतीच्या लक्षात आले. त्यानंतर तिने मांद्रे पोलिस ठाण्यात तक्रार दाखल केली. याप्रकरणी मांद्रे पोलिसांनी भारतीय न्याय संहिता कलम ३१८(४) अंतर्गत अज्ञाताविरुद्ध गुन्हा नोंदवून पुढील तपास सुरू केला आहे.

ऑनलाईन फसवणूक टाळण्यासाठी काळजी घ्या!

व्हॉट्सॲप, टेलिग्राम किंवा सोशल मीडियावरील घरबसल्या पार्टटाईम नोकरीच्या आकर्षक ऑफरवर सहज विश्वास ठेवू नका. कोणतीही नोकरी मिळवण्यासाठी किंवा कमावलेली रक्कम काढण्यासाठी पैसे भरण्याची मागणी होत असल्यास ती फसवणुकीची शक्यता समजा.

अनोळखी व्यक्तींना बँक खाते, ओटीपी, पासवर्ड किंवा वैयक्तिक माहिती देऊ नका. संबंधित कंपनीची अधिकृत माहिती व नोंदणी पडताळूनच व्यवहार करा. संशयास्पद लिंक, ॲप किंवा ग्रुप टाळा. फसवणुकीचा संशय आल्यास तत्काळ व्यवहार थांबवून बँकेला आणि जवळच्या पोलिस ठाण्यात किंवा सायबर हेल्पलाइन १९३० वर तक्रार नोंदवा.