पणजी: राज्यात मागील दोन-तीन आठवड्यांपासून मोठ्या प्रमाणात पडणाऱ्या थंडीत काही अंशी घट झाली असून थंडीचा जोर मंदावला आहे. मागील २४ तासांत राज्यात कमाल ३३.५ अंश सेल्सिअस इतक्या कमाल तापमानाची नोंद करण्यात आली असून किमान २०.७ अंश सेल्सिअस इतक्या तापमानाची नोंद करण्यात आली आहे.

सामान्य किमान तापमानाच्या तुलनेत ०.५ अंश सेल्सिअस अधिक तापमान नोंदविण्यात आले. राज्यात पुढील चार-पाच दिवस किमान तापमान हे २० ते २१ अंश सेल्सिअस दरम्यान राहण्याची शक्यता गोवा वेधशाळेने वर्तविली आहे.

म्हणजेच राज्यात थंडीचा जोर अजूनही काही प्रमाणात मंदावण्याची शक्यता आहे. राज्यात मागील काही दिवसांपासून रात्री जी कडाक्याची थंडी पडायची त्यात घट झाली आहे. रात्री पंखा किंवा वातानुकूलनाशिवाय झोपणे अशक्य होत आहे.

परंतु पहाटे पाचनंतर काही प्रमाणात थंडी पडत असून धुके देखील दाटत आहे. काही प्रमाणात पहाटे दव देखील पडत आहे.