पणजी: राज्यात मागील काही दिवसांपासून अवकाळी पावसाने हजेरी लावली होती. या पावसामुळे अनेक भागांत वातावरणात गारवा निर्माण झाला होता. मात्र, हवामानात झालेल्या या अचानक बदलानंतर आता गोव्यात उन्हाचा चटका अधिकच तीव्र होणार आहे. गोवा हवामान विभागाने येत्या ९ एप्रिलपर्यंत तापमान वाढीचा यलो अलर्ट जारी केला आहे.

हवामान विभागाच्या ताज्या अंदाजानुसार, तापमानात मोठी वाढ होण्याची शक्यता आहे. चार दिवसाचा यलो अलर्ट देण्यात हवामान विभागाकडून देण्यात आला आहे.

गोवा राज्यात मागील काही दिवसांपासून हवामानात सातत्याने बदल होत आहेत. अधूनमधून अवकाळी पावसाची हजेरी आणि त्यानंतर तीव्र उष्णतेची लाट अशा परिस्थितीमुळे शेतकरी आणि बागायतदार चिंतेच आहेत.

शनिवारी अनेक भागात मुसळधार पाऊस

शनिवारी (५ एप्रिल) पेडणे, सत्तरी, केपे आणि काणकोण या भागांत अवकाळी पावसाने जोरदार हजेरी लावली. त्यामुळे अनेक भागांत झाडांची पडझड पाहायला मिळाली. विजेच्या तारांवर झाडे पडल्याने वीजपुरवठा काही काळासाठी खंडित झाला. यामुळे स्थानिक नागरिकांना त्रास सहन करावा लागला.