मडगाव: गोमंतकीयांना २४ तास पाणी पुरवठ्याचे आश्वासन सरकारकडून देण्यात आले असले तरी अजूनही काही ठिकाणी अवघे काही तासच नळाला पाणी उपलब्ध होत आहे. त्यामुळे लोकांच्या तक्रारीही वाढल्या आहेत. २०२२ पासूनची आकडेवारी पाहिल्यास सासष्टी तालुक्यात सर्वांत जास्त म्हणजे २६८२ तक्रारी पाणी खात्याकडे नोंद झाल्या आहेत.

सासष्टी तालुका हा गोव्यातील सर्वांत जास्त लोकसंख्येचा तालुका असून या तालुक्यात राय, राशोल, कुडतरी, नुवे आणि नेसाय या भागातून पाण्याबाबत जास्त तक्रारी दाखल झाल्या आहेत. पाणी पुरवठा खात्याचे मंत्री सुभाष फळदेसाई यांनी याबाबत विधानसभेत उत्तर दिले आहे. त्यानुसार या तक्रारींपैकी बहुतेक पाणी पुरवठ्याबाबत नसून अन्य कारणांमुळे झालेल्या आहेत. यामध्ये वीज नसल्यामुळे पाणी पुरवठा बंद होणे, पाण्याची गळती व पाईपलाईन फुटल्यामुळे पुरवठ्यावर परिणाम होणे, तसेच वीज खात्याने घेतलेल्या शटडाऊनमुळे पाणी पुरवठा थांबणे याबाबतच्या तक्रारी आहेत.

विधानसभेत विचारलेल्या एका प्रश्नाला उत्तर देताना, गोव्यातील एकूण नळधारकांपैकी ५३.०५ टक्के नळधारकांना दिवसाला एक ते आठ तास पाणी मिळते. काही ठिकाणी नळाला पाणी येण्याचे प्रमाण दोन तासापेक्षाही कमी आहे. एकूण ९.४ टक्के ग्राहकांना दिवसाला चार तासापेक्षा कमी पाणी मिळते.

बार्देशमध्ये दोन दिवसांतून एकदा पाणी

बार्देश तालुक्यात चार तासापेक्षा कमी पाणी मिळण्याचे प्रमाण सर्वाधिक असून वेरे, रेईश मागूश आणि सांगोल्डा या भागांना अधिक अडचणींना सामोरे जावे लागले आहे. या भागात काही ठिकाणी दोन दिवसांतून एकदा पाणी उपलब्ध होते. या तालुक्यात मागच्या चार वर्षांत पाणी पुरवठ्याबाबत ९९६ तक्रारी पाणी खात्याकडे दाखल झाल्या आहेत.

पेडणेत तीन तास पाणी

तिसवाडी, सत्तरी आणि पेडणे या तालुक्यांनाही पाण्याची समस्या सतावत असून या तालुक्यात काही ठिकाणी दिवसाला फक्त तीन तासच नळाला पाणी उपलब्ध असते.

येथे मिळते २४ तास पाणी

गोव्यातील काही भागांमध्येच २४ तास पाणी उपलब्ध असून त्यात काणकोण आणि सांगे नगरपालिका क्षेत्र, मुरगाव तालुक्यातील केळोशी व वेळसाव, केपे तालुक्यातील काही गाव आणि मडगाव शहर यांचा समावेश आहे, जिथे पूर्णवेळ पाणी पुरवठा उपलब्ध आहे.