Goa Road Guide Line: वाळपई नगरपालिका क्षेत्रातील हातवाडा ते वाळपई - सावर्शे रस्त्यावर दिशादर्शक फलक नसल्याने ह्या रस्त्यादरम्यान प्रवास करणाऱ्या प्रवाशांचे हाल होत आहे. वाळपई फोंडा मार्ग ह्या रस्त्यावर रोज हजारोंच्या संख्येने प्रवासी प्रवास करत असतात. मात्र हातवाडा जॅक्सनवर फोंडा असे लिहिलेला दिशादर्शक फलक नसल्याने वाहनचालकांना अडचण येत आहे, ही अडचण दूर करण्यासाठी संबंधितांनी त्वरित दिशादर्शक फलक लावावे, अशी वाहन चालकांची मागणी आहे.

वाळपई-सावर्शे हा मार्ग प्रवासासाठी एकमेव मार्ग असून तांबडीसुर्ला, बोंडला अभियारण्याकडेजाण्यासाठी मोठ्या संख्येने पर्यटक येतात. पण रस्त्यावर दिशादर्शक फलक नसल्याने येणाऱ्या पर्यटकांची तारांबळ उडते. गोंधळलेल्या स्थिती पर्यटक कुठेही भरकटतात, असे स्थानिकांनी सांगितले.

तसेच, याबाबत आसीन उस्ताद म्हणाले, आम्ही या गावचे रहिवासी असून रस्त्यावर दिशादर्शक फलक नसल्याने येणाऱ्या पर्यटकांची दररोज गैरसोय होते आहे. अनेक वेळा प्रवासी रस्त्यावर थांबून स्थानिकांना रस्ता कुठून जातो, याबद्दल विचारतात. रात्रीच्या वेळी कुठे जायचे, ही मोठी समस्या निर्माण होते.