Municipality takes strict action against illegal construction in Valpoi:

राज्यातील बेकायदेशीर बांधकामासंबंधी सरकार अलर्टमोडवर असून काही आठवड्यांपूर्वी वागातोर किनाऱ्यालगतच्या बेकायदेशीर बांधकामावर सरकारने हातोडा चालवला होता.

अशाच प्रकारचे एक प्रकरण समोर येत असून वाळपई नगरपालिका क्षेत्रातील प्रभाग क्रमांक 9 मधील म्हाऊस मार्गावरील मुबारक अली खान यांच्या बेकायदेशीररीत्या बांधलेल्या बंगल्यावर आज सोमवारी वाळपई नगरपालिकेने धडक कारवाई केल्याची माहिती समोर येतेय.

मुबारक अली खान यांनी बेकायदेशीरपणे बांधलेल्या बंगल्यावर पालिका कर्मचाऱ्यांनी हातोडा उगारला. यावेळी सकाळ पासून मोठ्या प्रमाणात घराशेजारी पोलिस बंदोबस्त तैनात होता.

मात्र सदर घर मालकाने दोन दिवसाच्या आत घर खाली करून घर पाडण्याचे वचन दिल्याने पालिकेने या प्रकरणी माघार घेतली आहे.

माणुसकीच्या नात्याने आम्ही दोन दिवसांचा अवधी देत आहोत, मात्र निर्धारित वेळेत जर का घर खाली केले नाही तर गुरुवारी सकाळी कायदेशीररित्या घर पाडण्यात येईल असा इशारा पालिकेने खान यांना दिला आहे.

गेल्या एक वर्षापासून चर्चेत आहे.

मुबारक अली खान यांच्या विरुद्ध 2017 मध्ये अमीना बी शेख, शमसुद्दीनीशा खान, बद्रुनीशा खान, आफताब खान आदींनी बेकायदेशीर बांधकामाविरुध्द न्यायालयात धाव घेतली होती.

त्यानुसार 2017 पासुन मुबारक अली खान यांच्या विरुद्ध खटला सुरु झाला होता. त्यानंतर हा खटला नगर नियोजन खात्याकडे गेला.

2018 मध्ये न्यायालयाने जलद गतीने काम करत घर पाडण्याचे आदेश दिले होते मात्र हा खटला उच्च न्यायालयात गेल्याने घर पाडण्यास स्थगिती मिळाली होती.

मात्र आता उच्च न्यायालयाकडून देखील बेकायदेशीर बांधकाम पाडण्याचे आदेश देण्यात आल्याने अखेर खान यांच्या घराबवर हातोडा पडणार आहे.