पणजी : पंतप्रधान नरेंद्र मोदी यांच्या 71 व्या वाढदिवसाला कोरोना लसीकरणाचा दोन कोटींचा आकडा पार करून देशाने नवीन विक्रम नोंदविला. काल दिवसभरात (24 तासांत) दोन कोटी 22 लाखांहून अधिक जणांना लशीची मात्रा देण्यात आली.

पंतप्रधान नरेंद्र मोदी यांच्या वाढदिनानिमित्त दिवसभरात 25 हजार लोकांना कोविड लस देण्याचे उद्दिष्ट सरकारने ठेवले होते, मात्र कायमस्वरूपी आरोग्य केंद्र तसेच टिका उत्सव केंद्र मिळून 17,327 लसीकरणाची नोंद झाली. गेल्या चोवीस तासांत एकाचा मृत्यू झाला, तर 108 नवे कोरोनाबाधित आढळून आले. रुग्ण बरे होण्याची टक्केवारी 97.71 टक्क्यावर गेली.

राज्यात सक्रिय रुग्णांची संख्या 700 पेक्षा कमी होती मात्र ती आज 731 वर गेली. यावरून कोरोनाचे संकट अजूनही संपलेले नाही, याचे हे संकेत आहेत. गेल्या चोवीस तासांत गृह अलगीकरणात असलेले 75 रुग्ण बरे झाले आहेत, तर इस्पितळात उपचार घेत असलेले 13 रुग्ण बरे होऊन घरी परतले आहेत. दिवसभरात लसीकरणाचा पहिला डोस 2875 जणांनी तर दुसरा डोस 14,452 जणांनी घेतला आहे. आतापर्यंत पहिला डोस घेतल्यांची संख्या 6,44,553 तर दोन्ही डोस घेतल्यांची संख्या 5,29,529 वर पोहचली आहे.

राज्यांकडे लशींची कमतरता नाही

राज्यांकडे लशींची कमतरता नाही आणि त्यांच्या मागणीप्रमाणे केंद्राकडून सतत डोस पुरविले जात असल्याचा पुनरूच्चार आरोग्य मंत्रालयाने केला आहे. आज संध्याकाळपर्यंत राज्य सरकारांकडे 7 कोटी 60 लाख डोस शिल्लक आहेत. सप्टेंबर महिनाअखेर डीएनए लशीचे 1 कोटी डोस देशाला मिळतील. याशिवाय कोव्हिशिल्डचे 20 कोटी आणि कोव्हॅक्सीनचे 3. 25 कोटी डोस उपलब्ध होतील, असेही मंत्रालयाने सांगितले.