पणजी: गेल्‍या काही दिवसांपासून उकाड्याने हैराण झालेल्‍या गोमंतकीयांना शनिवारी किंचित दिलासा मिळाला. संध्‍याकाळच्‍या वेळी राज्‍याच्‍या काही भागांत गडगडाटासह पाऊस पडला.

राज्‍यात उकाडा प्रचंड वाढला आहे. त्‍यामुळे पावसाची शक्‍यता व्‍यक्त करण्‍यात येत होती. आज सकाळपासूनच वातावरण दमट होते.

संध्‍याकाळच्‍या सुमारास सांगे, केपे, मडगाव, धारबांदोडा, काणकोण, पेडणे, डिचोली, वाळपई, साखळी तसेच अन्‍य भागांत पावसाने हजेरी लावली. त्‍यामुळे काही ठिकाणी पडझड झाली तर ग्रामीण भागात वीजपुरवठा खंडित झाला. मात्र मोठे नुकसान झाल्‍याचे वृत्त नाही.

राजधानी पणजीतही संध्याकाळी साडेचारच्‍या सुमारास आकाशात ढग दाटून आले होते. परंतु पाऊस पडला नाही. दरम्‍यान, उद्या रविवारीही पावसाची शक्‍यता वर्तविली आहे.

वाढत्‍या तापमानामुळे आणखी उष्‍मा वाढणार

मागील चार दिवसांपासून कमाल तापमानाचा पारा ३६ अंशांवर आहे. उद्या रविवारीही हीच स्‍थिती असेल. त्‍यामुळे मोठ्या प्रमाणात उष्मा जाणवू शकतो. सोबतच संध्याकाळच्या सुमारास काही भागात तुरळक पाऊस देखील पडू शकतो.