Goa University : गोवा विद्यापीठातील मराठी विषयाचे सहायक प्राध्यापक, प्रा. चिन्मय मधू घैसास यांच्या ‘रेशीमगाठी’ या भाषांतरित पुस्तकाचा समावेश, नांदेड येथील स्वामी रामानंद तीर्थ मराठवाडा विद्यापीठाच्या पदव्युत्तर मराठी अभ्यासक्रमात करण्यात आला आहे.

२०१८ साली प्रकाशित झालेल्या या भाषांतरित ग्रंथात, साहित्य अकादमी पुरस्कारप्राप्त शीला कोळंबकर, स्व. संजीव वेरेकर आणि मुकेश थळी यांच्या निवडक कोंकणी ललित निबंधांचा मराठी अनुवाद समाविष्ट आहे.

संशोधक प्रा. (डॉ.) विजया जयंत देव यांची प्रस्तावना या ग्रंथाला लाभली आहे. स्वामी रामानंद तीर्थ मराठवाडा विद्यापीठाच्या विद्या परिषदेच्या अलीकडे झालेल्या बैठकीत विद्यापीठाच्या अभ्यासक्रमाची निश्चिती करण्यात आली.

नव्या राष्ट्रीय शिक्षण धोरणाला अनुसरून तयार करण्यात आलेल्या या अभ्यासक्रमात भाषांतर या अभ्यासपत्रिकेत ‘रेशीमगाठी’ या पुस्तकाचा समावेश करण्यात आला.

आकाशवाणी पणजी केंद्राचे निवृत्त वृत्तनिवेदक आणि भाषांतरकार मुकेश थळी यांच्या ‘मागीलदार’, ‘दिवे’, ‘रंग श्रावणाचे’, ‘स्पष्टतेतील स्पष्टता’ आणि ‘जीवनाचा रियाज’ या निबंधांचे भाषांतर प्रस्तुत पुस्तकात आले आहे. साहित्य अकादमी पुरस्कार विजेते तथा ख्यातनाम पत्रकार स्व. संजीव वेरेकर यांच्या ‘गावाकडे’,

‘खुबे’, ‘कुठे गेली ती प्रेमळ मने ?’, ‘सायकल’ आणि ‘व्यवस्था आणि अवस्था’ या निबंधांचा अनुवाद समाविष्ट आहे. साहित्य अकादमी पुरस्कारप्राप्त शीला कोळंबकर यांचे ‘गुलमोहर’, ‘छिमकणी’, ‘मिकी’, ‘कारवार : एक अनुभव’ आणि ‘लोणचे’ हे लेख या ग्रंथात भाषांतरित करण्यात आले आहेत.

गोमंतकीय जीवनाची ओळख

मराठवाडा विद्यापीठाच्या अभ्यासक्रमात हे पुस्तक समाविष्ट झाल्याने गोव्याबाहेरील आणि विशेषत: मराठवाड्यातील मराठी वाचक आणि अभ्यासकांना गोमंतकीय जीवन, भाषा, संस्कृती याविषयी अधिक चांगली ओळख होईल तसेच मूळ भाषा आणि साहित्याविषयी अधिक जाणून घेण्याची उत्सुकता निर्माण होईल, अशी भावना श्री. मुकेश थळी यांनी व्यक्त केली.