Scam in Vehicle on Rent in Goa: गोव्यात येणारे बहुतांशी पर्यटक हे फिरण्यासाठी वाहने भाड्याने घेतात. यामध्ये अनेक गैरप्रकार आजवर उघड झाले आहेत. याबाबत वाहतूक पोलीस अधीक्षक अक्षत कौशल यांनी दिलेल्या माहितीनुसार, अनेकजण आपली खाजगी वाहने पर्यटकांना भाड्याने देत असल्याचे उघडकीस आले आहे.

ते म्हणाले की, पर्यटकांना भाडेतत्वावर दिल्या जाणाऱ्या वाहनांना विशिष्ट नंबर प्लेट असते. त्यांनाच वाहने देण्यास परवानगी आहे. मात्र अनेकजण आपली खाजगी वाहने भाड्याने देत आहेत.

असे निदर्शनास आल्यावर संबंधितांवर कठोर कारवाई करण्यात येणार आहे. याबाबत वाहतूक विभागातर्फे मोहीम सुरू करण्यात आली असून असे करणाऱ्यांचा शोध घेणे सुरू आहे.

दरम्यान, अक्षत कौशल पुढे म्हणाले की, राज्यात येणाऱ्या पर्यटकांनीही याबाबत खबरदारी बाळगावी. कोणतीही वाहने भाड्याने घेण्यापूर्वी वाहनाचे संपूर्ण कागदपत्र, नोंदणी तपासून घ्यावी.