पणजी: गोव्यातील वाढत्या वाहतूक कोंडीला शाश्वत आणि दीर्घकालीन पर्याय म्हणून मेट्रो रेल्वे प्रकल्पाचा गंभीरपणे विचार करावा, अशी सूचना केंद्रीय नगर विकास मंत्री मनोहर लाल खट्टर यांनी राज्याला केली आहे. हैदराबाद येथे नुकत्याच झालेल्या बैठकीत त्यांनी ही महत्त्वपूर्ण सूचना मांडली.

सूत्रांनी दिलेल्या माहितीनुसार, या बैठकीत गोव्याचे प्रतिनिधित्व नगर विकास सचिव यतींद्र मरळकर यांनी केले. गोवा हे लहान राज्य असले तरी काणकोण, फोंडा, कुंकळ्ळी, मडगाव, पणजी, म्हापसा, पेडणे, डिचोली आणि वाळपई ही प्रमुख शहरे परस्परांशी जोडण्यासाठी आधुनिक, कार्यक्षम आणि पर्यावरणपूरक सार्वजनिक वाहतूक आवश्यक आहे.

मेट्रो नेटवर्क उभारल्यास राज्यातील वाहतूक कोंडी मोठ्या प्रमाणात कमी होऊ शकते, तसेच पर्यटक वाहतूक व स्थानिक प्रवास अधिक सुलभ होईल, असे बैठकीत सुचवण्यात आले आहे.

राज्य प्रशासनाला या पर्यायाचा अभ्यास करण्याचे आवाहन करताना, शहरी वाहतूक व्यवस्थेचे भविष्यातील गरजांनुसार नियोजन करण्याचेही केंद्रीय मंत्र्यांनी सुचवले. गोव्यातील वाढत्या वाहन संख्येच्या पार्श्वभूमीवर मेट्रो हा दीर्घकालीन उपाय ठरू शकतो, असा विश्वास त्यांनी व्यक्त केला, असे सूत्रांनी सांगितले.

केंद्राकडून मिळेल मदत

राज्यात मेट्रो मार्गाची उभारणी झाली तर केंद्र सरकारकडून ४ ते ७ हजार कोटी रुपयांची मदत मिळू शकते. केंद्र सरकार प्रकल्पासाठी १० टक्के थेट अनुदान देते. प्रकल्प १० हजार कोटी रुपयांचा असेल तर अनुदान १ हजार कोटी रुपयांचे असेल.

राज्य सरकार यासाठी केंद्रासोबत संयुक्त संस्था उभी करत असल्यास एकूण खर्चाच्या २० टक्के हिस्सा केंद्र सरकार उचलते. प्रकल्प लगेच नफ्यात येणार नसल्यास तूट भरपाई म्हणून खर्चाच्या १० ते २० टक्के आर्थिक मदत केंद्र सरकार देते.

...असे असू शकतील टप्पे

मेट्रो उभारणी करावयाची झाल्यास पणजी- मडगाव, पणजी-म्हापसा पहिल्या टप्प्यात, मडगाव-वास्को दुसऱ्या टप्प्यात, काणकोण-मडगाव-पणजी आणि कुंकळ्ळी-फोंडा-पणजी तिसऱ्या टप्प्यात असेल.