पणजी: गोव्यातील पर्यटनाला आंतराष्ट्रीय स्थरावर चालना मिळावी म्हणून गोवा सरकारतर्फे पर्यटन विभागाने न्यूयॉर्क शहरातील टाइम्स स्क्वेअर येथे डिजिटल होर्डिंग जाहिरात मोहिम राबवली होती.

न्यू यॉर्कमध्ये हे डिजिटल होर्डिंग लावण्यासाठी १.९७ कोटी खर्च केले होते आणि त्यावेळी गोवा फॉरवर्डचे आमदार विजय सरदेसाई यांनी विधानसभेत विचारलेल्या प्रश्नाचे लेखी उत्तर देताना गोव्याचे पर्यटनमंत्री रोहन खंवटे यांनी ही माहिती स्पष्ट केली.

गोव्यात आंतराष्ट्रीय पर्यटकांची वाढ व्हावी म्हणून गोवा पर्यटन विभागाकडून राबवल्या जाणाऱ्या अनेक महत्वाच्या मोहिमांपैकी ही एक आहे. गेल्या वर्षभरात गोव्याने जर्मनी, स्पेन, ऑस्ट्रिया, फ्रान्स, दुबई, सिंगापूर, जपान आणि उझबेकिस्तान सारख्या देशांमध्ये रोड शो आणि इतर कार्यक्रम तसेच प्रदर्शनांवर अंदाजे १४. ५ कोटी रुपये गोवा सरकारने खर्च केले आहेत.

आंतराष्ट्रीय पर्यटकांना आकर्षित करण्यासाठी गोवा सरकारने परदेशात विपणातील केलेली एक महत्वपूर्ण गुंतवणूक आहे. परदेशातील पर्यटकांना गोव्याकडे आकर्षित करावे आणि गोव्यातील पर्यटनामध्ये भर पडावी अशी सरकारची इच्छा आहे.

काय म्हणाले होते सरदेसाई?

फातोर्डाचे आमदार विजय सरदेसाई यांनी न्यूयॉर्कमधील टाईम्स स्क्वेअरमधील होर्डिंगवर प्रश्नचिन्ह उपस्थित केले होते. देशाचे पंतप्रधान नरेंद्र मोदी दौऱ्यावर असताना ही जाहिरात लावण्यात आली होती आणि त्यात मुख्यमंत्री आणि पर्यटन मंत्री यांचे चेहरे दाखवण्यात आले होते.

त्यामुळे जाहिरातीची वेळ आणि उद्देश यावरून पंतप्रधानांना त्यांचे समर्थक न्यूयॉर्कमध्ये देखील उपस्थित आहेत हे दाखवायचे आहे का? की लोक जाहिरात बघून थेट गोव्यात येतील असे म्हणायचे आहे? असा प्रश्न सरदेसाईंनी विचारला होता.