गोवा पर्यटन प्रोत्साहन आणि व्यवस्थापन विधेयकाचा मसुदा - २०२४ लोकांची मते व सूचनांसाठी खुला आहे. ६ जुलैची अंतिम मुदत १५ दिवसांनी वाढविण्यात येत असल्याची घोषणा पर्यटनमंत्री रोहन खंवटे यांनी आज केली.

राज्यातील पर्यटनाला नवा आयाम देत बेकायदेशीर गोष्टींविरुद्ध कारवाई करता यावी या हेतूनेच हे विधेयक असल्याचे खंवटे यांनी सांगितले. रोजगार निर्मिती आणि अर्थव्यवस्थेला चालना देण्यासाठी हे विधेयक लाभदायक ठरेल, असा विश्वास त्यांनी व्यक्त केला.

राज्यातील पर्यटन व्यवसायाला हे विधेयक बळकटी देणार आहे. सर्वांना विश्वासात घेऊनच हे विधेयक आणले आहे. पुढील १० दिवसांत मंत्री व आमदारांना विधेयकाबद्दल सादरीकरण करून त्याविषयीची स्पष्टता देणार असल्याचे ते म्हणाले.

स्पर्धात्मक पर्यटन काळात गोमंतकीयांसाठी त्यांचे व्यवसाय टिकवून ठेवणे आवश्यक आहे. त्यासाठी या विधेयकाचा लाभ होईल, असेही ते म्हणाले.

३३ बैठकांमधून सल्लामसलत

मागील ४० वर्षांत पर्यटन क्षेत्राचा कायापालट झाला आहे. अशावेळेस जुन्या कायद्यात बदल गरजेचे ठरतात. ३३ बैठकांमधून सल्लामसलत करून तयार केलेले हे विधेयक महत्त्वाचे आहे. विधेयकाचा मसुदा सूचनांसाठी खुला असल्यामुळे सर्वांचे सहकार्य आवश्यक असल्याचे ते म्हणाले.