पणजी: गोवा पर्यटन विकास महामंडळाच्या चिंबल येथील वादग्रस्त युनिटी मॉल प्रकल्पाला आणखी एक धक्का बसला आहे. उत्तर गोवा जिल्हा न्यायालयाने पंचायत उपसंचालकांच्या निर्णयाला अंतरिम स्थगिती दिली आहे.

उपसंचालकांनी चिंबल पंचायतीला या प्रकल्पासाठी बांधकाम परवाना देण्याचे आदेश जारी केले होते. मात्र, आता न्यायालयाच्या हस्तक्षेपामुळे गोवा पर्यटन विकास महामंडळाला बांधकाम परवाना जारी करण्याची पंचायतीची प्रशासकीय प्रक्रिया थांबली आहे.

या प्रस्तावित मॉलचे ठिकाण पर्यावरणाच्या दृष्टीने संवेदनशील असलेल्या तलावाजवळ असल्यामुळे पर्यावरणाला आणि स्थानिक जैवविविधतेला गंभीर धोका निर्माण होणार असल्याचा दावा ग्रामसभेत लोकांनी केला होता. ग्रामपंचायतीने ग्रामसभेतील तीव्र विरोधामुळे केंद्र-पुरस्कृत १७५ कोटी रुपयांच्या या प्रकल्पाला बांधकाम परवाना देण्यास नकार दिला होता.

त्यानंतर महामंडळाने गटविकास अधिकाऱ्यांकडे अर्ज करून परवानगी मागितली होती. त्यानंतर गटविकास अधिकाऱ्यांनी पंचायतीला परवाना देण्याचे आदेश दिल्यानंतर पंचायतीने पंचायत उपसंचालकांकडे या आदेशाला आव्हान दिले होते. दरम्यान पंचायत उपसंचालकांनी देखील हा आदेश कायम ठेवला होता.

१७ रोजी सुनावणी

सत्र न्यायालयाचा हा अंतरिम आदेश तात्काळ प्रभावाने लागू झाला असून यासंदर्भातील पुढील सुनावणी १७ डिसेंबर रोजी होणार आहे. या स्थगितीमुळे चिंबल ग्रामपंचायतीला गटविकास अधिकाऱ्यांनी दिलेले आणि पंचायत उपसंचालकांनी नुकतेच कायम ठेवलेले निर्देश पाळण्याची सक्ती नाही.