पणजी: अहमदाबाद येथे 12 जून रोजी झालेल्या विमान अपघातानंतर गोवा ते लंडन (गॅटविक) (Goa to London-Gatwick) दरम्यान बंद करण्यात आलेली एअर इंडियाची (Air India) विमानसेवा सप्टेंबर महिन्याच्या अखेरपर्यंत पुन्हा सुरु होईल, अशी माहिती पर्यटनमंत्री रोहन खंवटे (Rohan Khaunte) यांनी विधानसभेत बोलताना दिली.

दरम्यान, मंगळवारी (29 जुलै) विधानसभेत आपल्या विभागाच्या अनुदान मागण्यांवरील चर्चेदरम्यान पर्यटनमंत्री खंवटे म्हणाले की, गोव्याला (Goa) विविध ठिकाणांहून चांगले हवाई संपर्क (Air Connectivity) मिळणे हे राज्याच्या पर्यटन क्षेत्रासाठी एक मोठा बदल ठरत आहे. गेल्या महिन्यात अहमदाबादमधून लंडनला जाणाऱ्या एअर इंडियाच्या विमानाला अपघात (Accident) झाल्यानंतर गोव्याच्या मनोहर आंतरराष्ट्रीय विमानतळावरुन (Manohar International Airport) गॅटविकपर्यंतची उड्डाणे (Flights) तात्पुरती थांबवण्यात आली होती.

अहमदाबाद येथील अपघातात विमानात असलेल्या 241 प्रवाशांसह एकूण 260 लोकांचा मृत्यू झाला होता. मात्र आता गोवा आणि गॅटविक दरम्यानची थेट विमानसेवा सप्टेंबर महिन्याच्या अखेरपर्यंत पुन्हा सुरु होईल.

आमदार मायकल लोबो (Michael Lobo) यांनी लंडनहून गोव्याला येणाऱ्या लोकांसाठी एअर इंडियाची ही एकमेव थेट विमानसेवा असल्याचे म्हटले होते. त्यानंतर मुख्यमंत्री प्रमोद सावंत यांनी गेल्या आठवड्यात विधानसभेत बोलताना सांगितले होते की, ही विमानसेवा पुन्हा सुरु करण्यासाठी ते नागरी विमान मंत्रालयाशी (Ministry of Civil Aviation) चर्चा करतील.

खंवटे यांनी मंगळवारी विधानसभेत असेही सांगितले की, 5 ऑक्टोबर 2025 पासून रशियाची (Russia) विमान कंपनी एअरोफ्लोट (Aeroflot) येकातेरिनबर्गहून (Yekaterinburg) मनोहर आंतरराष्ट्रीय विमानतळापर्यंत आठवड्यातून तीन उड्डाणे (Three Flights a Week) सुरु करेल, ज्यात प्रत्येक विमानात 210 प्रवासी असतील. या सेवेमुळे आगामी हंगामात 13,000 हून अधिक रशियन पर्यटक (Russian Tourists) गोव्याला येण्याचा अंदाज आहे, असेही मंत्री म्हणाले. यामुळे गोव्याच्या पर्यटन उद्योगाला अधिक चालना मिळण्याची अपेक्षा आहे.