Goa Literacy Rate

पणजी: गोवा पुढील वर्षी १९ डिसेंबर २०२५ पर्यंत शंभर टक्के साक्षर होईल, असा विश्वास मुख्यमंत्री डॉ. प्रमोद सावंत यांनी व्यक्त केला. शनिवारी (०७ डिसेंबर) स्वंंयपूर्ण गोवा वेबिनार सत्रात मुख्यमंत्री सावंत बोलत होते. स्थानिकांना आणि पंचायतींना सोबत घेऊन १०० टक्के साक्षरतेच्या दिशेने वाटचाल करणार असल्याचे सावंत म्हणाले.

गोवा सरकार केंद्र सरकारच्या मदतीने किसान क्रेडिट कार्ड, किसान सॉईल कार्ड आणि किसान विमा कार्ड उपलब्ध करुन शेतकऱ्यांना देखील यात समाविष्ट करुन घेणार असल्याचे मुख्यमंत्री सावंत म्हणाले. १९ डिसेंबर २०२५ पर्यंत गोवा शंभर टक्के साक्षर होईल, असे सावंत म्हणाले. सर्व समुदाय आणि पंचायतींनी यासाठी सहकार्य करावे, कोणीही अशिक्षित राहणार नाही याची काळजी घ्यावी, असे आवाहन त्यांनी केले.

केरळ राज्य शंभर टक्के साक्षर असल्याचा दावा करते पण प्रत्यक्षात परिस्थिती वेगळी आहे. मात्र, गोव्यासाठी हे ध्येय खऱ्याअर्थाने पूर्ण करने सोप्प आहे, असे सावंत म्हणाले. शेतकऱ्यांना केंद्र सरकारच्या किसान क्रेडिट कार्ड, किसान सॉईल कार्ड आणि किसान विमा कार्ड यासारख्या योजना आणि सुविधांचा शंभर टक्के लाभ मिळायला हवा, असेही सावंत यावेळी म्हणाले.

मुख्यमंत्री डॉ. प्रमोद सावंत यांनी यावेळी राज्य सरकारतर्फे नियुक्त करण्यात आलेल्या स्वंयपूर्ण मित्रांचे कौतुक केले. स्वंयपूर्ण मित्रांमुळे केंद्र सरकारच्या योजना नागरिकांपर्यंत १०० टक्के पोहोचवण्यासाठी प्रयत्न करतायेत, असेही सावंत म्हणाले.