गोवा वैद्यकीय महाविद्यालायाच्या (GMC) बाहेर गाडे लावणाऱ्यांवर फळविक्रेत्यांवर (Fruit Seller) पुन्हा पोलिसांनी (Goa Police) कारवाई केली. धंद्यासाठी नवी जागा न दिल्याने व पूर्वीच्या विक्रेत्यांना डावलून नव्या विक्रेत्यांची जागेची व्यवस्था केल्याने, विक्रेते आणि पोलिस यांच्यात तणाव निर्माण झाला. सोमवारी सकाळी गोमेकॉच्या परिसराबाहेर मोठ्या प्रमाणात पोलीस फौजफाटाही यावेळी पाहायला मिळाला.

जीएमसी बाहेरील विक्रेत्यांना पोलिसांच्या मदतीनं हटवले गेले. यावेळी रामराव वाघ आणि रामा काणकोणकर यांनी पोलिसांना जाब विचारण्याचा प्रयत्न केला. परंतु , त्यांनाही पोलिसांनी ताब्यात घेतलं. विक्रेत्यांमध्ये तीव्र नाराजीचे सूर उमटत होते. विक्रेत्यांचे गाड्यांवर या अगोदरही कारवाई केली गेली होती. त्यावेळी दुसरीकडे जागा देऊ, असे आश्वासनही देण्यात आले होते. दरम्यान, जुन्या विक्रेत्यांचे पुनर्वसन झाले नसताना नव्या विक्रेत्यांना जागा देण्यात आली, त्यामुळे जुन्या विक्रेत्यांची नाराजी झाली. यावेळी निदर्शनं करताना स्थानिक नेत्यांसह जुन्या विक्रेत्यांनाही पोलिसांनी ताब्यात घेतलंय.