धारगळ: गोव्यातील प्रसिद्ध सनबर्न संगीत महोत्सवाला उच्च न्यायालयाकडून परवानगी मिळाली असल्याने यंदाच्यावर्षी देखील राज्यात हा संगीत महोत्सव होणार आहे. नाताळनंतर म्हणजेच २८ ते ३० डिसेंबरपर्यंत हा महोत्सव रंगेल. तुम्हाला माहिती आहे का या सनबर्न संगीत महोत्सवातून राज्य सरकारला २ कोटी २७ लाख १५ हजार रुपये मिळणार आहेत. सनबर्न संगीत महोत्सवात आयोजक कंपनीला १ कोटी ९९ लाख ६५ हजार रुपयांचे डिपॉझिट ठेवावे लागेल आणि कार्यक्रमाच्या शेवटी हे त्यांना परत केले जाईल.

गेल्या अनेक दिवसांपासून गोव्यात सनबर्न होणार की नाही यावर प्रश्नचिन्ह कायम होतं, काही दिवसांपूर्वी धारगळमध्ये होणाऱ्या सनबर्न महोत्सवाबाबत दोन मतप्रवाह असताना गोवा पर्यटन खात्याने महोत्सवाला तत्वत: मान्यता होती.

त्यानंतर ॲड जनरल देविदास पांगम यांनी माध्यमांना दिलेल्या माहितीनुसार सरकारचे निर्देश आणि उच्च न्यायालयाच्या मार्गदर्शक तत्त्वांसह सनबर्नला परवानगी दिली गेली.

डिसेंबर महिना म्हटलं की वर्षभराच्या तुलनेत गोव्यात येणाऱ्या पर्यटकांची संख्या वाढते. बाकी कोविडची दोन वर्ष वगळल्यास गोव्यात सनबर्न हा संगीत महोत्सव नेहमीच व्हायचा. सनबर्न सारख्या संगीत महोत्सवांमुळे पर्यटनावर आधारित व्यवसायांना फायदा होतो असं म्हटलं जातं आणि यानुसार सर्व नियम व अटींचे पालन करून आणि आवश्यक परवाने मिळवून हा संगीत महोत्सव साजरा करायला हरकत नसल्याची परवानगी राज्य सरकारने दिली आहे . मुंबई उच्च न्यायालयाने देखील या महोत्सवाला सशर्त मान्यता दिली आहे.