Subhash Phal Dessai: राज्यातील दिव्यांग व्यक्तींचा डाटा लवकरच तयार करण्यात येणार असून त्यात त्यांचे शिक्षण, वय, कौशल्य आदींची माहिती असणार आहे. दिव्यांगांना सरकारी नोकरी देताना हा डाटा महत्वपूर्ण ठरणार असल्याचे समाजकल्याण मंत्री सुभाष फळदेसाई यांनी सांगितले.

तसेच राष्ट्रपती भवनासह अनेक राज्यांकडून गोव्यातील पर्पल फेस्टची दखल घेण्यात आल्याचेही ते म्हणाले. तसेच राष्ट्रपती भवन देखील अशाप्रकारचे फेस्ट आयोजित करण्याच्या भूमिकेत असल्याची माहिती फळदेसाईं यांनी दिली.

काही महिन्यांपूर्वी राज्याने दिव्यांगजनांसाठी रोजगार संधींच्या निर्मितीसाठी आणि दिव्यांगांना उद्योग क्षेत्रांमधील कौशल्य प्रदान करण्याच्या उद्देशाने एक महत्वाचं पाऊल उचललं होतं.

राज्य दिव्यांगजन आयोगाने मुख्यमंत्री डॉ. प्रमोद सावंत यांच्या उपस्थितीत बेंगळुरू येथील ‘एनेबल इंडिया’ या एनजीओशी सहकार्य करारावर स्वाक्षऱ्या केल्‍या होत्या.

तसेच मुख्यमंत्री प्रमोद सावंत यांनी दिव्यांगांना सक्षम बनवण्याचे सरकारचे ध्येय असल्याचेही यापूर्वीच सांगितले होते. समाजकल्याण खात्याकडून घेण्यात आलेल्या या माहितीच्या आधारे दिव्यांग व्यक्तीं सक्षम बनवण्याच्या दृष्टीने एक पाऊल पुढे टाकणार आहे.