राज्‍यातील सर्व शैक्षणिक संस्थांना पावसाचे पाणी संवर्धन करण्यास जलस्त्रोत खाते भाग पाडेल. यापुढे खाते जलसंवर्धनासाठी जनतेत अधिक जागरूकता करेल, असे जलस्रोत खात्याचे जनसंपर्क अधिकारी नाझारेथ वाझ यांनी सांगितले.

नाझारेथ वाझ यांच्याकडून मिळालेल्या माहितीनुसार, गोव्यात एकूण पाच महाविद्यालयीन संस्था आहेत, ज्या पावसाच्या पाण्याचे संवर्धन करत आहेत. गेली काही वर्षे या संस्थांच्‍या उपक्रमांना यश आल्यामुळे यापुढे आम्ही सर्व शैक्षणिक संस्थांना पाणी संवर्धनाविषयी प्रोत्साहित करणार आहोत. खात्याने जलसंवर्धनासाठी अनेक उपक्रम हाती घेतलेले आहेत, ज्यात शेतकरी वर्ग, ग्रामीण भागातील जलस्त्रोत, विहिरींतील गाळ उपसून नवसंजीवनी देण्यासाठी आर्थिक मदतही करत आहे.

गोव्‍याला मोठी किनारपट्टी लाभली आहे. दरवर्षी राज्‍यात मुबलक पाऊस पडतो. मात्र पावसाचे पाणी थेट समुद्राला जाऊन मिळते. गेली अनेक वर्षे गोव्यात पाणीटंचाई जाणवतेय. त्यामुळे जलस्त्रोत खात्याने यंदापासून जलसंवर्धनावर अधिक भर दिलाय.

नाझारेथ वाझ, जलस्रोत खात्याचे जनसंपर्क अधिकारी