Department of Animal Husbandry: राज्यातील पशुपालकांसाठी महत्वाची बातमी हाती येतेय. जखमी तसेच आजारी असलेल्या पशूंच्या वैद्यकीय सेवेसाठी राज्य सरकारने मुख्यमंत्री पशु सेवा योजनेंतर्गत 24 तास सेवा देणारी पशु रुग्णवाहिका सेवा सुरू करण्याचा निर्णय घेतला आहे.

या योजनेत यामध्ये फिरती रुग्णालये तसेच दुचाकी रुग्णवाहिकांचा समावेश केला आहे. सदरच्या सेवेसाठी पशुपालकांना 200 ते 500 पर्यत सेवाशुल्क मोजावे लागणार असून भटक्या जनावरांसाठी ही सेवा मोफत पुरवली जाणार असल्याची माहिती मिळाली आहे.

पशुसंवर्धन खात्याने याबाबत अधिसूचना जारी केली आहे. अधिसूचनेनुसार ही सेवा पुरविणाऱ्या संस्थेला सहाय्यता निधी देण्यात येणार आहे.

यानुसार 3 रुग्णवाहिकांसाठी 69 लाख, अन्य साहित्यासाठी 9 लाख, 3 दुचाकी रुग्ण वाहिकांसाठी 3 लाख तर दुचाकी कॉल सेंटरसाठी 21 लाख रुपये देण्यात येणार असल्याचे वृत्त हाती आले आहे. ही सेवा देणाऱ्या संस्थेला सरकारकडून एका वर्षासाठी 1 कोटी 98 लाख रुपयांचे सहाय्य देण्यात येणार आहे.

काही महिन्यांपूर्वी राज्यातील पशुपालकांना गाई-गुरांना लागण होत असलेल्या लम्पी आजाराचा धोका होता. यावेळी पशुसंवर्धन खात्याकडून सुरक्षेच्या उपायांसहित आवश्यक ते औषधोपचार पुरवण्याचा प्रयत्न केला गेला होता.

आता शासनाच्या या योजनेमुळे पशुपालकांना आधार मिळणार असून उपचाराअभावी जनावरे दगावण्याचे प्रमाण कमी होणार असल्याचे बोलले जातेय.