पणजी: गोव्यात राज्य आपत्ती व्यवस्थापन प्राधिकरणाने राष्ट्रीय आपत्ती व्यवस्थापन प्राधिकरणाच्या सहकार्याने राज्यस्तरीय मॉक एक्सरसाइजचे आयोजन केले. या एक्सरसाइजमध्ये राज्यात चक्रीवादळासह इतर नैसर्गिक आपत्तीसंबंधी प्रशासनाच्या तयारीचा आढावा घेण्यात आला. मुरगाव पोर्ट, गोवा शिपयार्ड, बायना, फोंड्यासह नाकेरी-बेतूल इत्यादी ठिकाणी या मॉक एक्सरसाइजचे आयोजन करण्यात आले. नैसर्गिक आपत्तीमधून लोकांची सुरक्षित सुटका करण्यासोबत आरोग्य सेवा, संवाद यंत्रणा आणि प्रशासनाची तयारी कशी सुरु आहे हे या मॉक एक्सरसाइजमधून दाखवण्यात आले.

आपत्ती व्यवस्थापनाच्या तयारीचा आढावा

दरम्यान, या मॉक एक्सरसाइजमध्ये राज्यातील विविध आपत्ती व्यवस्थापन विभाग, आपत्कालीन सेवा, आणि प्रशासन यांचा सहभाग होता. या एक्सरसाइजमध्ये विविध आपत्तींवर तात्काळ प्रतिसाद देण्याच्या तयारीचा आढावा घेण्यात आला, ज्यामध्ये चक्रीवादळ, पूर, भूस्खलन आणि इतर नैसर्गिक आपत्तीमधून (Natural Disaster) लोकांची तात्काळ सुटका करण्यासोबत त्यांच्यापर्यंत आवश्यक मदत कशी पोहोचवता येणार हे दाखवण्यात आले.

मॉक एक्सरसाइजचे उद्दिष्ट काय?

तसेच, चक्रीवादळासारख्या आपत्तींवर तात्काळ आणि प्रभावी प्रतिसाद देण्यासाठी सर्व संबंधित विभागांची क्षमता तपासणे, आपत्ती निवारणासाठी राज्यस्तरीय आणि स्थानिक पातळीवरील समन्वयाची क्षमता वाढवणे, नागरिकांच्या सुरक्षिततेसाठी आपत्ती व्यवस्थापनाच्या सर्व स्तरांवर काम करण्याची तयारी सुनिश्चित करणे हे या मॉक एक्सरसाइजचे उद्दिष्ट होते.

नैसर्गिक आपत्तीमध्ये तातडीने प्रतिसाद देणे

नैसर्गिक आपत्तींमध्ये तातडीने प्रतिसाद देणे अत्यंत महत्त्वाचे असते. यासाठी सर्व संबंधित यंत्रणा एकत्र येऊन तत्परतेने निर्णय घेऊन कार्यवाही करतील याची खात्री मॉक एक्सरसाइजने दिली. अशाप्रकारे भविष्यात गोवा राज्य अधिक सक्षम होईल, जेव्हा कोणत्याही प्रकारच्या आपत्तीचा सामना करण्याची वेळ येईल.