पणजी: गोवा कर्मचारी निवड आयोगाने विविध खात्यांतील ७०९ रिक्त पदांची भरती जाहीर केली असल्याने राज्यातील तरुणांना रोजगाराची मोठी संधी उपलब्ध झाली आहे. त्यासाठी पुढील महिन्यात १६ मे पासून या विविध पदांसाठी आयोगातर्फे टू-टीयर सीबीटी परीक्षा घेतल्या जाणार असल्याचे जाहीर करण्यात आले आहे.

आयोगाने काढलेल्या या मेगा भरतीमध्ये सर्वाधिक ५९६ पदे ही पोलिस खात्यातील आहेत. आयोगाने यापूर्वी जाहीर केलेल्या शिक्षकांसह इतर विविध पदांसाठी १० मे पासून परीक्षा सीबीटी-२ची परीक्षा होणार आहे.

आता ही दुसरी संधी युवकांसाठी आयोगाने उपलब्ध करून दिली असल्याने या परीक्षेचे वेळापत्रक जाहीर करण्यात आले आहे. पोलिस खात्यातील हवालदारांची ३६० पदे भरली जाणार असून, त्यात ३०२ पुरूष आणि ५८ महिलांसाठी राखीव आहेत. त्याशिवाय सशस्त्र पोलिसांची ११९ पदे असून, पोलिस चालक (हवालदार) १११ पदे भरली जाणार आहेत.

ही भरती केवळ पोलिस खात्यापुरती मर्यादित नाही, तर वन विभाग व इतर विभागातील पदांचाही त्यात समावेश आहे. त्यात प्लाटून कमांडर (पुरुष) ४, राऊंड फॉरेस्टर २३, हवालदार (ग्रीझर)१, हवालदार (इलेक्ट्रिशियन) १, फॉरेस्ट गार्ड ९, सहायक अधीक्षक (पुरूष) ४, वार्डन (पुरूष) ६०, मेट्रोन १०, लास्कर ५ आणि एस्कॉर्ट (महिला) २ या एवढी रिक्त पदे भरली जाणार आहेत.

या पदांसाठी आवश्यक असणारी शैक्षणिक पात्रता व कौशल्यधारीत उमेदवारांना या प्रक्रियेत सहभागी होण्याची संधी मिळणार आहे. टू टायर सीबीटी १ परीक्षा १६, १७, २४, ३० आणि ३१ रोजी होणार आहे.

ई- ॲडमिट कार्ड!

ई-ॲडमिट कार्ड ८ मे रोजी सीबीईएस पोर्टलवर उमेदवाराच्या लॉगीनमध्ये उपलब्ध होईल. परीक्षेचे ठिकाण व वेळ आयोगाच्या संकेतस्थळावर उपलब्ध असेल. तसेच सीबीटी परीक्षेला उपस्थित राहणाऱ्या उमेदवारांनी आयोगाने केलेल्या सर्व सूचनांची अमलबजावणी करावी, असेही आयोगाने कळविले आहे.