Professional League: उत्तरार्धातील खेळ सुरू झाल्यानंतर लगेच पी. के. फासीन याने केलेल्या गोलमुळे धेंपो स्पोर्टस क्लबने गोवा फुटबॉल असोसिएशनच्या प्रोफेशनल लीग फुटबॉल स्पर्धेत महत्त्वपूर्ण विजय संपादन केला. त्यांनी स्पोर्टिंग क्लब द गोवा संघावर १-० अशी निसटती मात केली. या विजयासह गतविजेत्यांनी गुणतक्त्यात मुसंडी मारली.

वास्को येथील टिळक मैदानावर गोलशून्य पूर्वार्धानंतर ४७व्या मिनिटास फासीन याने केलेल्या गोलमुळे धेंपो क्लबने पूर्ण तीन गुणांची कमाई केली.

त्यांचे आता १९ लढतीनंतर ३७ गुण झाले असून गुणतक्त्यात अव्वल स्थान मिळाले आहे. पराभवामुळे ३४ गुणांसह स्पोर्टिंग गोवा संघ चौथ्या स्थानी कायम राहिला.

स्पर्धेतील आणखी एका सामन्यात बाणावली येथे चर्चिल ब्रदर्सने पणजी फुटबॉलर्सला २-० फरकाने हरविले. रॉजर परेराने १४व्या, तर शॅरियो गोम्स याने ४०व्या मिनिटास प्रत्येकी एक गोल केला.