Cuncolim Industrial Estate: कुंकळ्ळी औद्योगिक वसाहतीमधीलं प्रदूषण प्रकरण दिवसेंदिवस वाढत चालले असून त्याचा फटका स्थानिक रहिवाश्यांना बसत आहे. येथील अनेक प्रकल्पांतील सांडपाणी उघड्यावर तसेच चर मारुन त्यात सोडले जात आहे.

या प्रकारामुळे लगतच्या शेतजमिनी खराब बनत चालल्या असून लोकांना या दुर्गंधीचा सामना करावा लागतोय. त्याशिवाय कंपनीमधून निघणाऱ्या धुरामुळे वायूप्रदूषणही मोठ्या प्रमाणात होत आहे. कुंकळ्ळीतील औद्योगिक वसाहतीतील प्रदूषणाविरोधात याआधीही नागरिकांनी वारंवार राज्य सरकारचे लक्ष वेधलेले होते.

मात्र सरकारकडून हवा तसा प्रतिसाद न मिळाल्याने नागरिकांनी एकत्र येत कारवाईची मागणी केलेली आहे. गोवा प्रदूषण नियंत्रण महामंडळाकडून औद्योगिक वसाहतीतील कंपन्यांतून होणाऱ्या प्रदूषणाची पाहणी करण्यात आलेली होती.

मात्र त्यावर काहीशी दंडात्मक कारवाई करण्यात आली मात्र आवश्यक त्या उपाययोजना केलेल्या नसल्याने परिस्थिती गंभीर बनत असल्याचे स्थानिकांकडून बोलले जातेय. .

कुंकळ्ळीतील औद्योगिक वसाहतीत अनेक कामगार बेकायदेशीपणे राहत आहेत. प्रकल्पातील पाणी प्रक्रिया केल्याशिवाय सोडण्यात येत असल्याने शेतजमिनी खराब होतात.

यापेक्षाही धक्कादायक म्हणजे सांडपाणी बोअरवेल मारुन जमिनीत सोडण्यात येत असल्याने भविष्यात याचे गंभीर परिणाम स्थानिकांच्या आरोग्यावर होणार असल्याचे यावेळी उपस्थितांनी सांगितले.

तसेच पाण्याच्या जादा उपशामुळे भूगर्भातील पाण्याची पातळी खालावत असून या सर्व गोष्टी बंद होऊन कुंकळ्ळीवासीयांचा त्रास कमी होणार नाही, तोपर्यंत हा लढा सुरु ठेवणार असल्याचे उपस्थितांकडून सांगण्यात आले.