Goa Solapur Train Updates

पणजी: गोव्यातून सोलापूरला जाणारी रेल्वे पुन्हा सुरू करण्याचा विषय राज्यसभेत विशेष उल्लेखाद्वारे उपस्थित केला आहे. ही रेल्वेसेवा पुन्हा सुरू करावी यासाठी पाठपुरावा करू, असे राज्यसभेचे सदस्य सदानंद शेट तानावडे यांनी आज येथे पत्रकार परिषदेत सांगितले.

ते म्हणाले, अक्कलकोट, गाणगापूर व सोलापूर येथे जाणाऱ्या भाविकांसाठी ही रेल्वेसेवा सोयीची होती. नंतर ती बंद करण्यात आली. ती सुरू करावी अशी मागणी करावी अशी जनतेची सूचना होती म्हणून संसदेत हा विषय मांडला. आता रेल्वे मंत्रालयाला प्रस्ताव पाठवून या विषयाचा पाठपुरावा करण्यात येणार आहे.

संसदेच्या अर्थसंकल्पीय अधिवेशनात आपले केवळ नऊ प्रश्नच स्वीकारले गेले. कारण प्रत्यक्ष कामकाजासाठी ७ दिवस मिळाले होते, असे नमूद करून ते म्हणाले, १० मार्च ते ४ एप्रिल दरम्यान होणाऱ्या अर्थसंकल्पीय अधिवेशनात आणखीन प्रश्न चर्चेला येतील.

स्मार्ट सिटीचे काम पूर्ण झाल्यावर त्याचे फायदे समजून येतील. सध्या कामे सुरू असल्याने थोडा त्रास जाणवत आहे. नेवरा येथे रेल्वे स्थानक होणे गरजेचे आहे. कोणत्याही प्रकल्पाला काहीजण विरोध हे करतच असतात, असेही तानावडे म्हणाले. भाजपच्या माध्यम विभागाचे निमंत्रक प्रेमानंद म्हांब्रेे यांनी स्वागत व प्रास्ताविक केले.