Goa News: येथील श्री स्वामी समर्थ मठात 7 ते 9 नोव्हेंबरपर्यंत स्वामी समर्थ प्रकटदिन विविध धार्मिक तसेच सांस्कृतिक कार्यक्रमांनिशी साजरा करण्यात येणार आहे. विशेष म्हणजे, ‘कलर्स’ या टीव्ही चॅनलवरील जय जय श्री स्वामी समर्थ मालिकेमध्ये स्वामींची भूमिका साकारणारे अभिनेते अक्षय मुदवाडकर यांचा सत्कार करण्यात येणार आहे, अशी माहिती मठाचे संस्थापक नीलेश वेर्णेकर यांनी पत्रकार परिषदेत दिली.

7 आणि 8 रोजी सकाळी आठ वाजल्यापासून चोपडे-आगरवाडा, मोरजी, मांद्रे, हरमल, केरी, पालये, कोरगाव, तुये तसेच पार्से आणि 9 नोव्हेंबरला कामुर्ली तसेच शिवोली, सडये आणि ओशेल मिळून शिवोली पंचक्रोशीत समर्थांची सवाद्य पालखी मिरवणूक निघणार आहे.

तसेच शिवोली येथील मठात सकाळी 9 वाजल्यापासून स्वामींची पूजा-अर्चा, दुपारी आरती, तीर्थप्रसाद आणि महाप्रसादाचा कार्यक्रम होणार आहे. रात्री 8.30 वा. स्वामींच्या भक्तिगीतांवर आधारित नृत्यांचे सादरीकरण होणार आहेत. नंतर 9 वाजता मान्यवरांचा सत्कार सोहळा आयोजित केला आहे. यावेळी अभिनेते अक्षय मुदवाडकर उपस्थित राहाणार आहेत.