Goa Shipyard Limited गोवा शिपयार्ड लिमिटेड (जीएसएल) यांनी सागरी क्षेत्रात संशोधन आणि विकास उपक्रम प्रयत्नांना मजबुती देण्यासाठी मरिट्रॉनिक्स इंडिया प्रायव्हेट लिमिटेड ‘एमआयपीएल’ या कंपनीशी हातमिळवणी केली आहे.

तसेच उभय कंपन्यांनी दक्षिण आशियातील सर्वात प्रमुख सागरी प्रदर्शन असलेल्या इनमेक्स एसएमएम इंडिया या प्रदर्शनात एज ब्रँड उत्पादने सादर केली आहेत.

या उत्पादन सादरीकरण समारंभावेळी भारतीय तटरक्षक दलाचे महानिरीक्षक एच. के. शर्मा, गोवा शिपयार्ड लिमिटेडचे चेअरमन तथा एमडी ब्रजेश कुमार उपाध्याय व तटरक्षक दलाचे उपमहानिरीक्षक सुधीर साहनी उपस्थित होते.

इनमेक्स एसएमएम इंडिया या प्रदर्शनात ‘जीएसएल’ आणि ‘एमआयपीएल’ यांनी रडार, फोग आणि ‘इसीडीआयएस’ यासह स्वदेशी बनावटीचे डिझाईन्स असलेली एज उत्पादने प्रदर्शित केली आहेत.

विशेष म्हणजे ‘एज रडार’ हे मॅग्नेट्रॉन आधारीत स्कॅनर असलेले उपकरण आहे. तर ‘एज फोग’ हे उपकरण अत्यंत अचूक व देखभालीची गरज नसलेले मरीन फायबर ऑप्टिक गायरोकम्पास उपकरण आहे.

ब्रजेश कुमार उपाध्याय म्हणाले की, जीएसएलने ‘एमआयपीएल’शी भागीदारी केली आहे. यामुळे देशाच्या क्षमतेत वृध्दी होणार आहे. मरिट्रॉनिक्स इंडिया यांचे संचालक व्यंकटेशन एन. म्हणाले की, एज ब्रँडद्वारा भारतातून निर्यात वाढविण्यावर भर आहे.