Goa Session Court : कोलवाळ मध्यवर्ती कारागृहातील जखमी कैद्यांची तपासणी करून आरोग्य अहवाल सादर करण्याचे निर्देश उच्च न्यायालयाने कारागृह प्रशासनाला दिले आहेत. समीर शेख याच्यासह सहा कैद्यांनी तुरुंग अधिकाऱ्याकडून दादागिरी केल्याचा आरोप करत उच्च न्यायालयात याचिका दाखल केली होती, यावर हा न्यायालयाने हे निर्देश दिले आहेत.

राज्याचे एजी देविदास पांगम यांनी या सर्व कैद्यांची आरोग्य तपासणी करून तो अहवाल उद्या न्यायालयात सादर केली जाईल, असे स्पष्ट केले आहे. ही आरोग्य चाचणी कारागृहात केली जाईल आणि आवश्यकता भासल्यास या चाचणीसाठी कारागृहाबाहेर नेले जाईल, असेही ते म्हणाले.

३० मे रोजी जन्मठेपेची शिक्षा भोगत असलेले विजय कारबोटकर आणि टारझन पार्सेकर यांच्यात झालेल्या मारामारीनंतर तुरुंग अधिकाऱ्यांकडून दादागिरी आणि गैरवर्तन केल्याचा आरोप याचिकेत करण्यात आला आहे. समीर शेख, कुर्बान शेख, इस्माईल मुल्ला, सादिक बेल्लारी, मुस्ताफा शेख आणि मोहम्मद शरीफ शेख यांनी ही याचिका केली आहे.

राज्य सरकार, गृहसचिव, पोलीस महासंचालक, तुरुंग महानिरीक्षक ओमवीर सिंग बिष्णोई आणि कारागृह अधीक्षकांना या प्रकरणात प्रतिवादी करण्यात आले आहे. आरोपींच्या संदर्भात आम्ही प्रतिज्ञापत्र दाखल करू आणि उच्च न्यायालयाला या घटनेचा तपशीलवार स्पष्टीकरण देऊ, असे ॲड.पांगम यांनी सांगितले आहे. या प्रकरणाची पुढील सुनावणी २८ जून रोजी ठेवण्यात आली आहे.