Minister Mauvin Godinho On Climate Change

गोव्यात हवामान बदलाचे विपरीत परिणाम जाणवत आहेत. राज्यातील अंतर्गत गावांना कधी गारपीट तर कधी अवकाळी पाऊसाचा फटका बसत आहे, असे पंचायत आणि वाहतूक मंत्री माविन गुदिन्हो म्हणाले.

जागतिक बँकेने आयोजित केलेल्या इंडिया क्लायमेट अँड डेव्हलपमेंट पार्टनर्स मेळाव्याच्या समारोप कार्यक्रमाला बुधवारी (21 फेब्रुवारी) माविन गुदिन्हो संबोधित करत होते.

गोवा सरकार शाश्वत विकासावर आधीपासूनच काम करत आहे, असे माविन गुदिन्हो यावेळी म्हणाले.

गोवा लहान राज्य असल्याने जागतिक बँक आणि इतर एजन्सी गोव्यात काम करून, हवामान बदलाविरूद्धच्या लढ्यात एक उदाहरण म्हणून दाखवू शकतात, असेही गुदिन्हो म्हणाले.

हवामान बदल खऱ्या अर्थाने दिसून येत आहे आणि तो गोव्यापर्यंत पोहोचला आहे. पूर्वी लोक पावसाळा चार ते पाच महिने अनुभवत असत आणि हिवाळा आणि उन्हाळाही चांगला असत होता.

अलिकडे गोव्याच्या अंतर्गत गावांना गारपिटीचा तडाखा बसत आहे. तर, पाऊस अशा दिवसांतही पडतोय ज्याची आपण कधी कल्पनाही केली नसेल, असे गुदिन्हो म्हणाले.

हवामान बदलाचा समाना करणे अथवा त्यावर तोडगा काढणे हा केवळ पर्यावरण खात्याचा विषय असू शकत नाही, त्यासाठी प्रत्येकाने एकजुटीने काम करणे आवश्यक आहे, असे गुदिन्हो म्हणाले.