काणकोण: गावडोंगरी येथील प्राथमिक विद्यालयाच्या शिक्षिकेची बदली रद्द करण्यासाठी पालकांनी तालुका शिक्षणाधिकारी कार्यालयावर मोर्चा नेला. या शिक्षिकेची बदली रद्द करण्यात यावी, अशी मागणी त्यांनी केली. उल्लेखनीय म्हणजे, विद्यार्थ्यांनीही सलग दोन दिवस वर्गावर बहिष्कार टाकला. झिल्तावाडी-गावडोंगरी येथील प्राथमिक विद्यालयातील विद्यार्थींनी वर्गात न जाता गेल्या दोन‌ दिवसांपासून पटांगणात ठाण मांडून पसंत केले. हे विद्यार्थी आपल्या शिक्षिकेची शैक्षणिक वर्षाच्या ऐन काळात तडकाफडकी बदली केल्याने नाराज झाले आहेत.

पालकांनीही नाराजी व्यक्त केली आहे. या महिन्यात शाळेचे स्नेहसंमेलन व सहल आयोजित करण्यात आली आहे. परीक्षा तोंडावर आली असताना अचानक शिक्षिकेची (Teacher) बदली करून शिक्षण खाते नेमक काय सिद्ध करू पाहते, असा प्रश्न पालकांनी उपस्थित केला.

दरम्यान, या शाळेत पटसंख्या घटली असताना या शिक्षिकेने गावात फिरून विद्यार्थ्यांची संख्या वाढवली, तिने विद्यार्थ्यांची मने जिंकली. आता त्यांचीच अचानक बदली करीत असल्यामुळे आम्ही शाळेत जाणार नसल्याचे मुले सांगत आहेत. या शिक्षिकेची बदली रद्द करण्याबाबतचे निवेदन शिक्षण खात्यालाही पाठवण्यात आल्याचे पालकांनी सांगितले.

१.झिल्तावाडी-गावडोंगरी येथील सरकारी प्राथमिक शाळेचे वर्गावर बहिष्कार टाकून पटांगणात बसलेले विद्यार्थी (Student).

२.झिल्तावाडी-गावडोंगरी येथील सरकारी प्राथमिक शाळेचे पालक शिक्षिकेची बदली रद्द करण्याचे निवेदन तालुका शिक्षणाधिकाऱ्याना देताना.

३.झिल्तावाडी-गावडोंगरी येथील सरकारी प्राथमिक शाळेचे विद्यार्थी व पालक.