डिचोली: एक पर्यटनस्थळ म्हणून ओळख असलेल्या साखळी येथील श्री संस्थान दत्तवाडी मंदिरातील देवतांच्या पुरातन तीन मूर्ती गायब होण्याचा प्रकार उघडकीस आला असून, या प्रकारामुळे महाजनांमध्ये खळबळ माजली आहे.

दरम्यान, याप्रकरणी डिचोली पोलिसांनी दोघांना अटक केली असून, मूर्तींची वाहतूक करण्यासाठी वापरण्यात आलेली मोटारगाडी जप्त केली आहे. डिचोलीचे मामलेदार तथा देवालयांचे प्रशासक दत्तप्रसाद तोरस्कर यांनी केलेल्या तक्रारीला अनुसरून पोलिसांनी कारवाई करून श्याम बोडके (साखळी) आणि दीपेश कामत (डिचोली) या संशयितांना अटक केली आहे. गेल्या मंगळवारी (ता.२४) मूर्ती चोरीची ही घटना घडली आहे.

याप्रकरणी देवालय प्रशासक तथा डिचोलीच्या मामलेदारांनी केलेल्या तक्रारीला अनुसरून पोलिसांनी ‘बीएनएस’च्या ३०५ आणि २९९ रीड व्हिथ ३(५) गुन्हा नोंद करून वरील कारवाई केली. मूर्ती चोरून नंतर त्यांची वाहतूक करण्यासाठी वापरण्यात आलेली एक आलिशान मोटारगाडीही पोलिसांनी जप्त केली आहे. उत्तर गोव्याचे पोलिस अधीक्षक राहुल गुप्ता यांच्या मार्गदर्शनाखाली पोलिस या प्रकरणाचा पुढील तपास करीत आहेत.

धार्मिक भावना दुखावल्या

उपलब्ध माहितीनुसार, श्री संस्थान दत्तवाडी मंदिरातील देवी अन्नपूर्णा, गणपती आणि मारुतीराय या तीन देवतांच्या पुरातन आणि मौल्यवान मूर्ती चोरीस गेल्या आहेत. या मूर्तींची परस्पर विल्हेवाट लावून महाजन आणि भाविकांच्या धार्मिक भावना दुखावण्यात आहेत.