Sanjivani Sugar Factory धारबांदोडा गोमंतक ऊस उत्पादक संघटनेने पत्रकार परिषद घेऊन सरकारने आम्हाला न्याय घ्यावा, अशी मागणी केली. तसेच जोपर्यंत शेतकऱ्यांचा प्रश्न सोडवणार नाही, तोपर्यंत संजीवनी सहकारी साखर कारखान्याची एक इंचसुद्धा जमीन आम्ही देणार नाही, असा स्पष्ट निर्धार शेतकऱ्यांनी केला.

ऊस उत्पादक संघटनेचे अध्यक्ष राजेंद्र देसाई म्हणाले, सरकार आम्हाला स्पष्ट काहीही सांगत नाही. ऊस उत्पादकांचा प्रश्नही सोडवण्याकडे मुख्यमंत्री डॉ. प्रमोद सावंत दुर्लक्ष करीत आहेत.

यासाठी आम्ही 17 जुलै रोजी आम्ही सर्वसाधारण सभा घेतली, तेव्हा सरकार आम्हाला स्पष्ट सांगत नसल्याने रस्ता रोको करण्याचे स्पष्ट सांगितले.

त्यानुसार आम्ही रस्ता रोको केला, तेव्हा पोलिसांनी आम्हाला ताब्यातही घेतले होते. त्यानंतर आम्हाला मुख्यमंत्री डॉ. सावंत यांनी पणजीला बोलविले, तेव्हा आम्हाला ‘एक्झिट’व्हा’, असे सांगितले, हे चुकीचे सांगणे आहे.

हर्षल प्रभुदेसाई म्हणाले, सरकारनेच आम्हांला इथेनॉल प्रकल्प आणतो, असे सांगून फसवले. इथेनॉल प्रकल्पासाठी तुम्ही कंपनी शोधा, आम्ही जमीन व सहकार्य करू, असे तोंडी सांगितले. आम्हांला ‘एक्झिट’ करायचे असेल तर साधन सुविधा समिती कशाला काढली? आम्हांला का झुलवत ठेवले?

संजीवनी सहकारी साखर कारखान्यातील साधन सुविधा समितीचे अध्यक्ष नरेंद्र सावईकर यांची भेट घेऊन सर्व समस्या सांगितल्या, तेव्हा मुख्यमंत्री डॉ. प्रमोद सावंत यांची भेट आपण घेणार असून या भेटीत ऊस उत्पादकांचा प्रश्न आपण सविस्तर मांडणार असल्याचे त्यांनी सांगितले, असे फ्रांसिस मास्करेन्हास यांनी सांगितले.

इथेनॉलसाठी प्रतिसाद नाही!

इथेनॉल प्रकल्पासाठी प्रतिसाद नाही. उसाच्या उपलब्धते अभावी संजीवनी इथेनॉल प्रकल्पासाठी अद्याप कोणीही पुढे आलेले नाही. जर कोणी सहकार क्षेत्रातील हा प्रकल्प चालविण्यास आल्यास आम्ही त्यांचे स्वागत करू असे आज मुख्यमंत्री डॉ. प्रमोद सावंत यांनी सभागृहात सांगितले.