पणजी: राज्यात समग्र शिक्षा अभियानांतर्गत कला शिक्षक म्हणून नियुक्त झालेल्या शिक्षकांना अखेर वर्षभरानंतर वेतन मिळणार आहे. त्यांना राज्याच्या निधीतून वेतन देण्याचा निर्णय राज्य सरकारने आज झालेल्या मंत्रिमंडळ बैठकीत घेतला.

राज्यातील शाळांमध्ये समग्र शिक्षा अभियानांतर्गत नाट्य, संगीत, नृत्य, चित्रकला अशा कलाशाखांकरिता शिक्षकांची नियुक्ती करण्यात आली. १५ ऑगस्ट २०२३ रोजी या शिक्षकांची निवड करण्यात आली होती. नियुक्तीनंतर त्यांनी आपापल्या शाळांमध्ये नियमितपणे सेवा सुरू केली आहे. पण आठ महिने उलटून गेले तरी त्यांना एकही महिन्याचे वेतन मिळालेले नव्हते.

मुख्यमंत्री डॉ. प्रमोद सावंत यांनी मंत्रिमंडळ बैठकीनंतर घेतलेल्या पत्रकार परिषदेत सांगितले, की राज्य सरकार आपल्या निधीतून त्यांना वेतन देणार आहे. त्यासाठीचा तांत्रिक अडथळा दूर करण्याचा निर्णय घेण्यात आला आहे.

मंत्रिमंडळाच्या बैठकीत महानियंत्रक व महालेखापालांचा २०२३-२४ साठीचा अहवाल स्वीकृत करून विधानसभेत सादर करण्याचेही ठरवण्यात आले आहे. उत्तर व दक्षिण गोवा जिल्हा खनिज निधीच्या विनियोगासाठी मिनरल फाऊंडेशनच्या नियुक्तीला कार्योत्तर मंजुरीही देण्यात आली आहे.

सांगे येथील एका पुलाच्या कामात अडथळा ठरत असलेल्या मिनिनो डिसोझा यांच्या घराच्या बदल्यात त्यांना सार्वजनिक बांधकाम खात्याचा १ हजार ४७२ चौरस मीटरचा भूखंड देण्यासही मंत्रिमंडळाने मान्यता दिली आहे. यामुळे तो पूल कार्यान्वित करता येईल, असे मुख्यमंत्र्यांनी सांगितले.