Sal River Goa गिरकरवाडा - हरमल येथील एनडीझेड क्षेत्रातील सीआरझेड भागात झालेल्या एका बेकायदा बांधकामाची दखल घेऊन कारवाईचे निर्देश दिल्याची घटना ताजी असतानाच आता राज्यातील अन्य अनधिकृत बांधकामांविरुद्ध खंडपीठाने आक्रमक भूमिका घेत कठोर कारवाईचे निर्देश दिले आहेत. विशेष म्हणजे उभी राहिलेली अनेक बांधकामे पाडण्याचे आदेश देण्यात आले आहेत.

केळशी पंचायतमधील पर्यावरण संवेदनशील क्षेत्रातील ‘एनडीझेड’च्या सर्वे क्रमांक 106/3 मधील साळ नदीच्या काठावरील कथित बेकायदा पब तथा पार्टी स्थळाचे बांधकाम पाडण्याचा आदेश बुधवारी मुंबई उच्च न्यायालयाच्या गोवा खंडपीठाने दिल्याची माहिती हाती आली आहे.

या बांधकामाविरोधात कारवाई कऱण्याकडे दुर्लक्ष केल्याप्रकरणी दक्षिण गोव्यातील पंचायत उपसंचालक तसेच गटविकास अधिकाऱ्यांविरुद्ध चौकशी प्रक्रिया सुरू करण्याचे निर्देशही पंचायत संचालकांना दिले आहेत.

परवाने न घेता हे बांधकाम केल्याचा दावा करण्यात आला होता. यामुळे पर्यावरणाचे नुकसान व ‘सीआरझेड’ नियमांचे उल्लंघन झाले आहे. हे क्षेत्र एनडीझेडमध्ये येत असल्याने कारवाईची विनंती करण्यात आली होती.

या तक्रारीची दखल घेत पंचायतीने बांधकाम मालकाला 23 जून रोजी नोटीस बजावून ‘काम बंद’ ठेवण्याचे निर्देश दिले होते. मात्र, त्याची अंमलबजावणी न करता बांधकाम सुरूच ठेवले होते. त्यामुळे या स्थळावरील हे बांधकाम पाडण्याचा आदेश बुधवारी मुंबई उच्च न्यायालयाच्या गोवा खंडपीठाने दिलाय