फोंडा: फोंडा तालुक्यातील साकोर्डा येथे कॅनरा बँक जंक्शनजवळ चिरे वाहतूक करणारा एक ट्रक रस्त्याच्या दुभाजकाला धडकून पलटी झाला. सुदैवाने या अपघातात कोणतीही जीवितहानी झाली नाही. हा ट्रक मळे–साकोर्डा मार्गे कथित बेकायदेशीर खाणीतून चिरे घेऊन जात असल्याचा आरोप स्थानिकांनी केला आहे.

मलपण परिसरातील काही ठिकाणी अजूनही बेकायदेशीररित्या चिरे खाणी सुरू असून तेथूनच हा माल भरून साकोर्डा मार्गे वाहतूक केली जात होती. मलपण–साकोर्डा मार्गावर आरटीओ, पोलिस किंवा अन्य तपासणी यंत्रणांची वर्दळ कमी असल्याने या मार्गाचा वापर केला जात असल्याचा आरोपही ग्रामस्थांनी केला. या घटनेनंतर परिसरातील नागरिकांनी संताप व्यक्त करत या मार्गावर सुरू असलेल्या अवजड वाहनांच्या वाहतुकीबाबत चिंता व्यक्त केली आहे.

अपघातस्थळाजवळ माध्यमिक व उच्च माध्यमिक शाळा असून दररोज सुमारे ४०० ते ५०० विद्यार्थी या मार्गाने ये-जा करतात. अशा परिस्थितीत चिरे वाहतूक करणाऱ्या अवजड वाहनांमुळे भविष्यात मोठा अपघात होण्याची भीती पालक आणि स्थानिकांनी व्यक्त केली आहे. दरम्यान, सप्टेंबर महिन्यात खनिज विभागाने मलपण परिसरातील कथित बेकायदेशीर खाणींवर छापेमारी केली होती.

नागरिकांचा संताप

बेकायदेशीररीत्या चिरे उत्खनन आणि वाहतूक करणाऱ्यांवर स्थानिक पोलिसांकडून कोणतीही कारवाई होत नसल्याने नागरिकांमध्ये संतापाची भावना आहे. मलपण गावात अनेक चिरे खाणी असून संबंधित यंत्रणांच्या डोळ्यादेखत हे प्रकार सुरू असतानाही प्रशासन गप्प का, असा सवाल नागरिकांनी उपस्थित केला आहे.