Panaji: राज्यातील शहरांमध्ये सुरू असलेली जी सुडाची कामे तातडीने करण्यासाठीच्या सूचना प्रशासनाला देण्यात आल्या असून रस्त्यांचा विस्तार, सुशोभीकरण आणि ग्रीन हब बनवण्यावर आमचे लक्ष असेल, अशी माहिती नगर विकास आणि नगर नियोजन मंत्री विश्वजीत राणे यांनी दिली आहे. जी सुडा अंतर्गत सुरू असलेल्या कामांच्या सल्लागारांच्या आढावा बैठकीनंतर ते बोलत होते.

मंत्री राणे म्हणाले, आम्ही आज सत्तरी आणि राज्यभर सुरू असलेल्या जी सुडा संबंधित कामांचा आढावा घेतला. या प्रकल्पामध्ये विविध खुल्या जागांची सुधारणा आणि सुशोभीकरण समाविष्ट आहे. याशिवाय रस्त्यांचा विस्तार आणि सुशोभीकरण, शहरांमध्ये ग्रीन हब विकसित करणे, तसेच नगरपालिका क्षेत्रांमध्ये पदपथ उभारणी करणे, यावर लक्ष केंद्रित करत आहोत. दर्जेदार पायाभूत सुविधा निर्माण करण्यावर आमचा भर आहे. या साधन सुविधांचा कामाचा दर्जा उत्तम ठेवण्यासाठी आम्ही प्रयत्नशील आहोत.

प्रकल्प वेळेत पूर्ण करणार

जी सुडा अंतर्गत प्रकल्प वेळेत पूर्ण करावे अशा सूचना प्रशासनाला देण्यात आल्या आहेत. यासाठी प्रकल्पांसाठीची वेळ निश्चित करून त्याप्रमाणे नियोजन करावे. कामात सातत्य आणि दर्जा राहावा यासाठी सर्वांनी सतर्क राहण्यासही सांगितले आहे.