Road Construction Ponda: फोंड्यातील बराच काळ अडून राहिलेले रस्त्यांचे हॉटमिक्स डांबरीकरण सध्या सुरू झाले आहे. सांताक्रुझ येथून या हॉटमिक्स डांबरीकरणाला सुरुवात झाली होती. आता खडपाबांधमधील अंतर्गत रस्ते चकाचक करण्यावर भर देण्यात येत आहे.

सुमारे चार कोटी रुपये खर्चून फोंड्यातील या रस्त्यांचे काम जोरात सुरू आहे. शहर व इतर भागातील रस्त्यांची कामे टप्प्याटप्प्याने पूर्ण करून लोकांना स्वच्छ, सुंदर रस्ते उपलब्ध करून देण्याची ग्वाही फोंड्याचे आमदार तथा राज्याचे कृषीमंत्री रवी नाईक यांनी दिली.

बुधवारी खडपाबांध-फोंड्यातील अंतर्गत रस्त्यांच्या हॉटमिक्स डांबरीकरणाला कृषीमंत्री रवी नाईक यांच्या हस्ते प्रारंभ करण्यात आला. यावेळी फोंडा नगराध्यक्ष रितेश नाईक तसेच स्थानिक नगरसेवक विलियम आगियार व सार्वजनिक बांधकाम खात्याचे अधिकारी उपस्थित होते.

फोंड्यातील रस्त्यांचे हॉटमिक्स डांबरीकरणाचे काम बराच काळ रखडल्याने लोकांचे हाल होत होते. शहर परिसरातील मुख्य रस्त्याचे काम हे मलनिस्सारण प्रकल्पाचे काम सुरू असल्याने अडून राहिले आहे.

त्यातच वाहने नादुरुस्त होण्याचे प्रकार मोठ्या प्रमाणात होत असल्याने शहरातील रस्त्यांचे डांबरीकरण करण्याची जोरदार मागणी करण्यात येत होती. ती आता लवकरच पूर्ण होणार आहे.

मलनिस्सारण प्रकल्पामुळे काम अडले

फोंड्यातील मलनिस्सारण प्रकल्पाच्या कामामुळे रस्त्यांचे हॉटमिक्स डांबरीकरणाचे काम अडले होते. आता मलनिस्सारण प्रकल्पाचे काम पूर्णत्वास येत असून नजीकच्या काळात या प्रकल्पाची जोडणीही ग्राहकांना देण्यात येणार आहे. त्यामुळे स्वच्छ, सुंदर फोंड्याची कल्पना मूर्त रूपात येईल, असे नागरिकांनी सांगितले.

ई-वेस्ट कचरा मोहिमेस प्रारंभ!

फोंडा लायन्स क्लबतर्फे हिलदारी यांच्या सहकार्याने फोंडा पालिका क्षेत्रात ई-वेस्ट कचरा संकलन मोहीम सुरू करण्यात आली आहे. येत्या 14 फेब्रुवारीपर्यंत फोंडावासीयांनी आपल्या घरातील ई-वेस्ट कचरा अर्थातच टाकाऊ टिव्ही, कॉम्प्युटर तसेच इतर साहित्य ढवळी येथील पंकज कॉर्पोरेशनमध्ये आणून द्यावे, असे आवाहन फोंडा नगराध्यक्ष रितेश नाईक तसेच लायन्स क्लबच्या पदाधिकाऱ्यांनी केले आहे.