पर्जन्यवृष्टीमुळे सकाळी सर्वत्र हा:हाकार माजला असतानाच, दुपारी पावसाचा जोर कमी झाल्याने डिचोलीत (Bicholim) परिस्थिती तूर्तास नियंत्रणात आहे. दुपारी पावसाचा जोर कमी झाला असला, तरी आकाशात ढगांची दाटी कायम आहे. त्यामुळे तूर्तास धोका टळला असला, तरी पुन्हा पावसाची कोसळधार होण्याची शक्यता आहे. दरम्यान, कोसळधार पावसामुळे मंगळवारी सकाळी डिचोलीत दोन ठिकाणी रस्त्यावर झाडे कोसळली.

नद्यांची पातळी नियंत्रणात

काल सकाळी पावसाने रौद्रावतार धारण केल्यानंतर नदीनाल्यांतील पाण्याची अचानक होती. डिचोली नदीसह साखळीतून वाहणाऱ्या वाळवंटी नदीच्या पाण्याची पातळी वाढली होती. डिचोली नदीसह साखळीतील वाळवंटी नदीचे पाणी बाहेर फुटले होते. नदीकाठी जलमय स्थिती झाली होती. जलस्रोत खात्यातर्फे डिचोली आणि साखळीत नदीकाठी पम्पिंग सुरु करण्यात आले. सोमवारी दुपारपर्यंतची परिस्थिती डिचोलीत पुराचा तडाखा बसतोय की काय, अशी परिस्थिती निर्माण झाली असतानाच, दुपारी पावसाचा जोर कमी झाल्याने नद्यांची पातळी ओसरू लागली.

सोमवारी सायंकाळपर्यंत नद्यांची पातळी पूर्णपणे नियंत्रणात आली. काल रात्री पावसाने पुन्हा जोर धरला. मंगळवारी सकाळपासून ते दुपारपर्यंत मुसळधार पावसाने सर्वत्र झोडपून काढले. त्यामुळे नद्यांची पातळी पुन्हा वाढण्याची भिती निर्माण झाली होती. मात्र दुपारपर्यंत पाण्याची पातळी नियंत्रणात होती. सोमवारी दुपारपर्यंत डिचोली नदीच्या पाण्याची पातळी 3.6 तर साखळीतील वाळवंटी 3 मीटरहून अधिक झाली होती. पावसाचा जोर उतरल्यानंतर डिचोली नदीची पातळी 3.3 तर साखळी नदीची पातळी 2.3 मीटरपर्यंत खाली आली होती. मंगळवारी मुसळधार पाऊस पडूनही दुपारपर्यंत नद्यांच्या पातळीत विशेष वाढ झाली नव्हती.