बार्देश: पुनर्वसन केंद्रातून अपहरण करण्यात आलेल्या दोन अल्पवयीन मुलींपैकी एक मुलगी तब्बल अडिच महिन्यानंतर दिल्ली येथे सापडली असून, दुसरी मुलगी अद्याप बेपत्ताच आहे. कोलवाळ पोलिसांनी दिल्लीतून मुलीचा शोध घेऊन पोलिस स्थानकात हजर केले. दरम्यान, दुसऱ्या मुलीचा शोध अद्याप सुरु आहे.

पोलिसांनी दिलेल्या माहितीनुसार, माडेल, थिवी बार्देश येथील नवज्योती पुनर्वसन केंद्रातून १३ आणि १५ वर्षीय दोन अल्पवयीन मुलींचे अपहरण करण्यात आले होते. याप्रकरणी ३० जानेवारी रोजी योगिनी लोप्स (४८) यांनी कोलवाळ पोलिस स्थानकात तक्रार दाखल केली होती. पोलिसांनी यावरुन भारतीय न्याय संहिता कलम १३७ (२) आणि गोवा बाल कायद्याच्या कलम ८ अंतर्गत गुन्हा नोंद केला.

पोलिसांनी विविध तंत्रज्ञानाच्या मदतीने अपहरण करण्यात आलेल्या मुलींचा शोध घेण्यास सुरवात केली. दरम्यान, १३ वर्षीय मुलीचा शोध दिल्लीत लागला, मुलीला सुखरुपपणे कोलवाळ पोलिस स्थानकात हजर करण्यात आले. पण, १५ वर्षीय दुसरी मुलगी अद्याप बेपत्ता असून, तिचा शोध घेतला जात आहे.

पोलिस निरीक्षक विजय राणे, पोलिस उपनिरिक्षक दत्ताराज राणे, पोलिस कॉन्स्टेबल गौरेश शेट्ये, शामल चारी, अनिता शकलकर यांच्या टीमने उत्तर गोवा पोलिस अधीक्षक अक्षत कौशल आणि एसडीपीओ आशिष शिरोडकर यांच्या मार्गदर्शनाखाली ही कारवाई केली.